Պակիստանի իշխանությունները իրականացրել են Անսար Իքբալի մահապատիժը, որին մեղադրում էին սպանության մեջ։ Ըստ որոշ տեղեկությունների՝ Իքբալը սպանությունը կատարել է նախքան չափահաս դառնալը, հայտնում է Yahoo! News-ը՝ վկայակոչելով AP-ը։
Փենջաբի նահանգի Սագոդհա քաղաքի բանտի պաշտոնական ներկայացուցիչ Օմար Քարուքը հայտնել է, որ մահապատիժն իրականացվել է երեքշաբթի։
Մահապատիժն առաջ է բերել միջազգային հանրության վրդովմունքը։ Իրավապաշտպանները պնդում են, որ տղամարդուն մահապատժի են ենթարկել հանցագործության համար, որը նա կատարել է անչափահաս ժամանակ։
Reprieve-ի տեղեկություններով՝ Անսար Իքբալը կալանավորվել եւ սպանության մեջ է մեղադրվել 1994թ., երբ դեռ անչափահաս է եղել։ Իսկ մահապատժի է դատապարտվել 1996թ., գրում է The Khaleej Times-ը։
Դատարանը հավատացել է ոստիկանության ներկայացրած տեղեկություններին, որոնց համաձայն՝ մեղադրյալը ավելի քան 20 տարեկան է եղել։
Ինչպես գրում է The Independent-ը, Իքբալի ծննդյան փաստը ժամանակին չի արձանագրվել, ինչն ընդունված պրակտիկա է Պակիստանում։ Ծննդյան վկայականը տրվել է միայն այս տարի, սակայն Գերագույն դատարանը, որը հաստատել էր մահապատիժը, հայտարարել է, որ փաստաթուղթը շատ ուշ է ստացել, գրում է Newsru.com-ը։