«Չեք անցկացնի» նախաձեռնության 4 անդամներ երեկ բերման են ենթարկվել ոստիկանության Կենտրոնական բաժին: Այս մասին NEWS.am-ի հետ զրույցում ասաց նախաձեռնության անդամ Դավիթ Հովհաննիսյանը՝ ավելացնելով, որ Արթուր Միասյանը, Հրայր Մանուկյանը, Կարպիս Փաշոյանը եւ Հայկ Ավետիքյանը փորձել են քաղաքացիներին իրազեկել Ազատության հրապարակում հոկտեմբերի 2-ին կայանալիք հանրահավաքի մասին՝ հանրային նշանակության շենքերի պատերին՝ «Ոչ» գրությունը թողնելու միջոցով:
Ըստ Դավիթ Հովհաննիսյանի՝ ոստիկանները խոչընդոտել են իրենց իրազեկման ակցիան, հետապնդել են երիտասարդներին եւ մի խմբին Մաշտոցի պողոտայից, մյուսին՝ Տիգրան-Մեծ-Խանջյան խաչմերուկից բերման են ենթարկել, մոտ երկու ժամ պահել են բաժնում,վարչական վարույթ հարուցել, ապա բաց թողել:
Երիտասարդների նկատմամբ, ըստ Հովհաննիսյանի, բռնություն չի կիրառվել:
«Միայն հեռախոսներն են խլել, չեն թողել զանգել որեւէ մեկին, չեն թողել փաստաբանների հետ կապ հաստատել»,-ասաց նա:
Դավիթ Հարությունյանի խոսքով՝ իրազեկման ակցիան օրենքի սահմաններում է եղել, քանի որ երիտասարդները «Ոչ» գրություններ արել են ոչ թե պատմամշակութային, այլ հանրային նշանակություն ունեցող շինությունների վրա:
«Չեք անցկացնի» նախաձեռնությունը կշարունակի իրազեկման ակցիաները: Վաղը նախատեսվում է իրազեկման երթ, որի ժամանակ թռուցիկներ կբաժանեն քաղաքացիներին:
