Հայաստանում Մարդու իրավունքների պաշտպանի գրասենյակը հրատապ քննության է առել փաստաբան Նիկոլայ Բաղդասարյանի դիմումը, որում վերջինը նախաքննական գաղտնիքը ապօրինի ձեռք բերելու եւ տարածելու մեղադրանքով իր նկատմամբ քրեական հետապնդումը մարդու իրավունքների խախտում է որակել՝ ակնկալելով օմբուդսմենի համարժեք արձագանքը:
Մարդու իրավունքների պաշտպանի օգնական Շուշան Դանիելյանը NEWS.am-ի հետ զրույցում նշեց, որ իրենք Նիկոլայ Բաղդասարյանի դեմ հարուցված քրեական գործի վերաբերյալ տեղեկություն ստանալու նպատակով գրություններ են ուղարկել ՀՀ Քննչական կոմիտե եւ Գլխավոր դատախազություն:
«Դիմումը հրատապ կարգով ուսումնասիրվում է: Երբ օմբուդսմենը դիմումներ է ստանում, ըստ օրենքի, պարտավոր է պարզաբանումներ պահանջել պետական մարմիններից: Մենք արդեն գրություններ ենք ուղարկել Քննչական կոմիտե եւ դատախազություն, տեղեկատվություն ենք ուզել»,-ասաց ՄԻՊ օգնականը՝ ավելացնելով, որ դիմումի քննության վերաբերյալ վերջնական պատասխան կտրամադրեն ավելի ուշ:
Նշենք, որ Կարեն Անդրեասյանին ուղղված նամակում Նիկոլայ Բաղդասարյանը նշել է, որ ինքը որպես պաշտպան ՀՀ քրեական դատավարության օրենսգրքի 170-րդ հոդվածի համաձայն նախազգուշացված չի եղել քրեական գործից ստացված ապացույցը չհրապարակելու մասին, իրենից չեն վերցրել ստորագրություն եւ չեն նախազգուշացրել պատասխանատվության մասին, իսկ տուժող կողմը չի միջնորդել, որպեսզի դռնփակ նիստ անեն, այսինքն` ՀՀ քրեական դատավարության օրենսգրքի 170-րդ հոդվածի համաձայն` ինքն իրավունք ուներ այդ փաստաթուղթը հրապարակել, որն էլ արել է, բայց, ըստ քննիչի գնահատման, այդ փաստաթուղթը փաստաբանը հրապարակել է ապօրինի:
Փաստաբանը նամակում նաեւ գրել է, որ այն գործողությունները, որոնց կատարման համար իրեն մեղադրանք է առաջադրվել ՀՀ քրեական դատավարության օրենսգրքով եւ «Փաստաբանության մասին» ՀՀ օրենքով նախատեսված փաստաբանի գործառույթներ են:
Նշենք, որ ըստ քննիչի տված բանավոր պարզաբանման՝ Նիկոլայ Բաղդասարյանին մեղադրանք է առաջադրել այն բանի համար, որ վերջինը փաստաբան Նազելի Վարդանյանի հետ առանց վկայի համաձայնության դատարանից ստացել եւ տարածել է քրեական գործին կցված փաստաթղթի պատճեն։ Նիկոլայ Բաղդասարյանի դեմ քրեական գործը հարուցվել է Քրեական օրենսգրքի 144-րդ հոդվածով, այն է՝ անձնական կամ ընտանեկան կյանքի մասին տեղեկություններ ապօրինի հավաքելը, պահելը, օգտագործելը կամ տարածելը:
