«Տաշիր» խումբն ու «Ինտեր ՌԱՕ» ընկերությունը «Հայաստանի էլեկտրական ցանցեր» ընկերության առք ու վաճառքի վերաբերյալ պայմանագիր են ստորագրել: Այս մասին հաղորդագրություն է տարածել «Ինտեր ՌԱՕ» ընկերությունը, գրում է Vedomosti-ն:
Նշվում է, որ գործարքն ավարտին կհասնի ՀՀ կառավարության կողմից հավանության արժանանալուց եւ Հանրային ծառայությունները կարգավորող հանձնաժողովի որոշումից հետո:
Կողմերը պայմանավորվել են, որ «Հայաստանի էլեկտրական ցանցերն» ու «Հրազդանի ՋԷԿ»-ը, որոնք գործարքի առարկա են, կշարունակեն ամբողջ ծավալով կատարել ավելի վաղ իրենց ստանձնած պարտավորությունները:
Ավելի ուշ «Ինտերֆաքս» գործակալությունը հայտնել է, որ «Ինտեր ՌԱՕ»-ն սխալմամբ է իր կայքում նման հաղորդագրություն տեղադրել:
Հիշեցնենք, որ օգոստոսի 1-ից ուժի մեջ է մտել էլեկտրաէներգիայի սակագնի բարձրացման որոշումը: Վարչապետ Հովիկ Աբրահամյանը հայտարարել է, որ ավելացված 6.93 դրամը կսուբսիդավորվի արտաբյուջետային միջոցներից՝ «Որոտան» կասկադի վաճառքից ստացված գումարից: