Թուրքիայի վարչապետ Ահմեդ Դավութօղլուն խոստովանեց Սիրիայում «Իսլամական պետության» դեմ ԱՄՆ-ի գլխավորության օդային հարվածներ հասցնելու երկրի մասնակցության իրական նպատակը. այն է՝ սիրիացի քրդերի հետագա առաջխաղացման կանխում: Այս մասին գրել է ALNOMITOR-ը:
Աղբյուրի համաձայն, Նյու Յորքում ՄԱԿ-ի Գլխավոր վեհաժողովի նստաշրջանում ելույթից առաջ լրագրողների հետ զրույցում Թուրքիայի վարչապետը հայտարարություններ է արել, որոնք հստակ ցույց են տալիս. Անկարան մտադիր չէ փոխել Սիրիայի նկատմամբ հիմնական քաղաքականությունը: Դավութօղլուի հայտարարությունները նաեւ ենթադրում էին, որ Անկարան Վաշինգտոնի եւ Մոսկվայի հետ տարաձայնություններ ունի Սիրիայում առաջնահերթությունների եւ այդ երկրի նախագահ Բաշար Ասադի ապագայի շուրջ:
Ստամբուլի Kadir Has համալսարանի միջազգային հարաբերությունների պրոֆեսոր, թուրքական Habertur պարբերականի սյունակագիր Սոլի Օզելը Թուրքիայի մերձավորարեւելյան քաղաքականությունը «ֆիասկո» է բնորոշել: Նա կարծում է, որ իրականությունն ընդունելու՝ Անկարայի անկարողությունը, որը դրա փոխարեն շարունակում է պնդել սխալ դիրքորոշումները, իրականում քող է, որի նպատակն այդ իրադարձությունների շուրջ սեփական անօգնականությունը քողարկելն է:
«Անհանգստացնում է այն, որ Անկարան միջազգային կարեւոր ֆորումներում կրկնում է արդեն ձախողված մոտեցումը՝ չնայած չի կարող մյուսներին ստիպել հետեւել այդ մոտեցմանը կամ օգնել փոխել իրադարձությունների ընթացքը »,- նշել է Սոլի Օզելը:
Նրա համոզմամբ, իրական նպատակն ավելի շատ ներքին, քան արտաքին քաղաքականության մեջ է: «Արտաքին քաղաքականությունը շարունակում է կապիտալ ապահովել կառավարության համար՝ ներքին քաղաքականության տեսանկյունից, քանի որ երկիրն ընտրությունների է պատրաստվում»,- ամփոփել է Օզելը:
