Գորիսի «Սդղի գյոլում» մայիսի 2-ին տեղի ունեցած միջադեպի հետեւանքով վնասվածք ստացած Հարություն Զաքարյանը 3 ամիս անց կրկին վիրահատվելու է: Այս մասին NEWS.am-ի թղթակցի հետ զրույցում ասաց Զաքարյանի հայրը՝ Գագիկ Զաքարյանը:
«Որդիս վիրահատվել է մի քանի օր առաջ, սակայն վերջնական վիրահատությունը լինելու է 3 ամսից: Այդ ժամանակ էլ պարզ կլինի՝ տեսողությունը կվերականգնվի, թե ոչ»,- ասաց Գագիկ Զաքարյանը:
Նրա խոսքով՝ իրենց ընտանիքը հաղթանակել է, քանի որ Սյունիքի մարզպետի ընտանիքից 4 անձի մեղադրանք է առաջադրվել եւ կալանքի տակ են:
Նշենք, որ ըստ փորձաքննության՝ Հարություն Զաքարյանին հարվածել է Յուրա Մանուչյարյանը: Մինչդեռ հուլիսին տուժող Հարություն Զաքարյանը հայտարարել էր, որ Տիգրան Խաչատրյանն է իր աչքի վնասվածքը հասցրել, ինչից հետո ինքը կորցրել է տեսողությունը։ Տիգրան Խաչատրյանը պնդում է, որ ներկա է եղել վեճին, սակայն որեւէ մեկին վնասվածք չի հասցրել, ինքը միայն փորձել է բաժանել վիճողներին։ Հուլիսի 27-ին Տիգրան Խաչատրյանին մեղադրանք է առաջադրվել Քրեական օրենսգրքի 112-րդ հոդվածի 1-ին մասով: Խափանման միջոց է ընտրվել կալանավորումը, իսկ հոկտեմբերի 1-ին Տիգրան Խաչատրյանին ազատ էին արձակել, քանի որ տուժողը փոխել էր իր ցուցմունքը։
Ավելի վաղ Քննչական կոմիտեն հաղորդել էր, որ 2015թ. մայիսի 2-ին՝ ժամը 17:00-ի սահմաններում, տեղի է ունեցել վիճաբանություն՝ դրանից ժամեր առաջ Գորիս քաղաքում տեղի ունեցած ավտովթարի կապակցությամբ, որի հետեւանքով վնասվել էր Մուշեղ Զաքարյանի վարած ավտոմեքենայի կողային հայելին։
Վիճաբանության ժամանակ մի խումբ անձանց կողմից բռնություն է գործադրվել Մուշեղ եւ Հարություն Զաքարյանների նկատմամբ, որի հետեւանքով Մ. Զաքարյանին պատճառվել է միջին ծանրության, իսկ Հ.Զաքարյանին` ծանր մարմնական վնաս:
