Վազգեն Սարգսյանի անվան ռազմական ինստիտուտում սպանված կուրսանտ Հայկազ Բարսեղյանի դեպքի առթիվ նոր քրեական գործ է հարուցվել:

NEWS.am-ին Քննչական կոմիտեի մամուլի ծառայությունից հայտնեցին, որ Հայկազ Բարսեղյանի սպանության դեպքի առթիվ քննվող քրեական գործի նախաքննության ընթացքում որոշում է կայացվել քրեական գործի նյութերով Քրեական օրենսգրքի 375-րդ հոդվածի 1-ին մասով նոր քրեական գործ հարուցել:

Քրգործ է հարուցվել այն փաստով, որ ՊՆ Վազգեն Սարգսյանի անվան ռազմական ինստիտուտի հրամանատարի տեղակալ Սարմիկ Մարկոսյանը, հանդիսանալով պաշտոնատար անձ, անցնելով պաշտոնեական լիազորությունների սահմանը, անձնական շահագրգռվածությունից ելնելով, 2014թ. օգոստոսից մինչեւ 2015թ. հունվարի 28-ը պարբերաբար հանձնարարաել է ենթակա համապատասխան սպաներին՝ առանց համապատասխան փաստաթղթերի ձեւակերպման, իր որդուն՝ նույն զորամասի կուրսանտ Գ. Թեւոսյանին, ազատել ծառայողական պարտականությունները կատարելուց եւ թույլատրել բացակայել զորամասի տարածքից, դրանով իսկ արտոնյալ պայմաններ է ստեղծել Գ. Թեւոսյանի համար: Այսպիսով, Գ. Թեւոսյանն արհեստականորեն ստացել է առավելություն, ինչով զինծառայողների շրջանում ստեղծվել է անհավասարության մթնոլորտ:

Նշենք, որ Գ. Թեւոսյանը Հայկազ Բարսեղյանի սպանության գործով մեղադրյալներից է:

Հիշեցնենք, որ 2015թ. հունվարի 29-ին՝ ժամը 06:35-ի սահմանում Երեւանում տեղակայված ուսումնական զորամասերից մեկի մարզահրապարակում հայտնաբերվել էր նույն զորամասի 1-ին կուրսի ուսանող Հայկազ Արկադիի Բարսեղյանի դին՝ պտտաձողի վրա պարանով կախված վիճակում:

Դեպքի առթիվ ՀՀ քննչական կոմիտեի զինվորական քննչական գլխավոր վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 7-րդ կետով: Մեղադրանք է առաջադրվել Հայկազ Բարսեղյանի համածառայակիցներ Վաչե Սահակյանին, Մովսես Ազարյանին, Գնել Թեւոսյանին եւ Նորիկ Սահակյանին, նրանք կալանավորված են:

Նույն դեպքով օրեր անց կալանավորվել է նաեւ Վազգեն Սարգսյանի անվան ռազմական ինստիտուտի սպա, կապիտան Արտյոմ Ավետիսյանը, որին մեղադրանք է առաջադրվել Քրեական օրենսգրքի 375-րդ հոդվածի 1-ին մասով:

Սպանության մասով նախաքննությունն ավարտվել է: