Այն, որ «Հայաստանի էլեկտրական ցանցերի» գնորդը գրանցված է օֆշորում, ինքնըստինքյան խնդիր չէ։ Այս մասին հոկտեմբերի 1-ին՝ ՀԷՑ-ը ռուսական «Ինտեր ՌԱՕ» հոլդինգից «Տաշիր» ընկերությունների խմբին վաճառելու մասին գործարքին հավանություն տալուց հետո, լրագրողներին հայտարարեց Հայաստանի հանրային ծառայությունները կարգավորող հանձնաժողովի անդամ Սամվել Արաբաջյանը։
ՀԷՑ-ի բաժնետոմսերի 100 տոկոսը վաճառվել է Կիպրոսում գրանցված «Լիորմանդ Հոլդինգս Լիմիթեդ» ընկերության անունով։
Այդուհանդերձ, Արաբաջյանը ընդգծեց, որ եթե ընկերությունը բարեխիղճ կառավարի ՀԷՑ-ը եւ կատարի պետության առաջ ստանձնած պարտավորությունները, ապա ընկերության գրանցումը ոչ մի նշանակություն չունի։
Նա հիշեցրել է, որ Midland Resources Holding Ltd ընկերությունը, որը 2002թ. սեփականաշնորհել էր ՀԷՑ-ը, նույնպես գրանցված էր օֆշորում, սակայն 2-3 տարվա ընթացքում ցանցում կորուստները նվազեցին 30 տոկոսով։
Հիշեցնենք, որ չնայած բազմաթիվ բողոքներին, ՀԾԿՀ-ը հունիսի 17-ին հաստատել էր էլեկտրականության սակագնի 6,93 դրամով բարձրացումը` գինը հասցնելով մինչեւ մեկ կիլովատտ/ժամի համար 48,78 դրամի (մոտ 10,3 ամերիկյան ցենտի):
Հունիսի 27-ին` ցույցերի 6-րդ օրը, Սերժ Սարգսյանը խորհրդակցություն է անցկացրել պետական պաշտոնյաների հետ, որոնք պատասխանատու են տնտեսական քաղաքականության համար: Խորհրդակցության ընթացքում նա հայտարարել է, որ մինչեւ միջազգային աուդիտի ավարտը, որը կստուգի սակագնի բարձրացման պահանջի արդարացիությունը, Կառավարությունն իր վրա կվերցնի հավելյալ 6,93 դրամի բեռը:
«Տաշիր» խմբի նախագահ Սամվել Կարապետյանը պատրաստակամություն է հայտնել իր անձնական միջոցների հաշվին մինչեւ 2016թ. օգոստոսի 1-ը կառավարության հետ հավասար հիմունքներով փոխհատուցել սակագների տարբերությունը ամսական մինչեւ 250 կիլովատ էլեկտրաէներգիա օգտագործող բնակչության եւ փոքր բիզնեսի համար: