Սանկտ Պետերբուրգում ՀՀ գլխավոր հյուպատոսարանում սեպտեմբերի 30-ին մեկնարկել պիլոտային ծրագիր, որը հնարավորություն կընձեռնվի ինչպես մեր հայրենակիցներին, այնպես էլ տվյալ երկրների բնակիչներին՝ առանց անձամբ Հայաստանում լինելու, տեղեկատվություն ստանալ եւ գործարքների վերաբերյալ ներկայացնել ու ստանալ համապատասխան փաստաթղթեր ՀՀ-ում գտնվող անշարժ գույքի վերաբերյալ: Ծրագիրը գործարկվել է ՀՀ ԿԱ անշարժ գույքի կադաստրի պետական կոմիտեի նախագահ Մարտին Սարգսյանի եւ գլխավոր հյուպատոս Հրայր Կարապետյանի գլխավորությամբ:
Դեռեւս 2015 թ. հունվարից կադաստրի պետական կոմիտեի կողմից նոտարներին հնարավորություն տրվեց կադաստրի համակարգից էլեկտրոնային կապի միջոցով ստանալ քաղաքացուն հետաքրքրող անշարժ գույքի միավորի վերաբերյալ միասնական տեղեկատվություն, ստանալ ու դիմողին տրամադրել անշարժ գույքի նկատմամբ իրավունքների պետական գրանցման վկայականը: Հետագայում, կադաստրի համակարգում կատարվող բարեփոխումների շրջանակներում, որոշվեց նման կարգավիճակ տրամադրել նաեւ արտերկրում գտնվող Հայաստանի Հանրապետության դեսպաններին եւ հյուպատոսներին` անշարժ գույքի հետ առնչվող հարցերում Սփյուռքի մեր հայրենակիցների հոգսը թեթեւացնելու համար:
Նախատեսված ծրագիրը հաջողությամբ գործարկելու դեպքում, փորձը կտարածվի նաեւ Ռուսաստանի Դաշնության, ինչպես նաեւ այլ երկրների հայաշատ քաղաքներում:
