Ղարաբաղյան հակամարտության գոտում լարված իրավիճակի վրա ազդելու լծակներ միջազգային համայնքն իհարկե ունի: Բայց իհարկե միջազգային հանրությունը չի օգտագործում այդ լծակները: Այս մասին հոկտեմբերի 1-ի մամուլի ասուլիսում հայտարարել է ՀՀ Հանրապետական կուսակցության անդամ ԱԺ պատգամավոր Կարեն Բեքարյանը:
Նրա համոզմունքով դրա պատճառը կարելի է ձեւակերպել շատ պարզ բանաձեւով՝ շահերը արժեքներից վեր են դասվում, այստեղ ոչ մի նոր բան չկա: «Իհարկե այս դիրքորոշումը վտանգավոր է, քանի որ չկա գիտակցում, որ այս մոտեցումն արդյունավետ է միայն կարճաժամկետ հեռանկարում: Եթե հանկարծ իրավիճակը դուրս գա վերահսկողությունից, նույնիսկ նրանք, ովքեր շահեր ունեին, չեն շահի»,- շեշտեց Բեքարյանը: Այս գիտակցության բացակայությունը, պատգամավորի կարծիքով, պատասխանատվության բեռ է դնում միջազգային հանրության վրա՝ հեղված արյան ու զոհված մարդկանց համար: «Շատ դանդաղորեն, բայց աստիճանաբար այդ գիտակցությունը հասունանում է, բայց մեր տղաների կյանքերի հաշվին»,- հավելեց պատգամավորը: