Հայաստանի դատական դեպարտամենտի կազմում ստեղծվել է ՄԻԵԴ վճիռների վերլուծության բաժինը, որը որը պետք է աջակցություն ցուցաբերի ՀՀ վճռաբեկ դատարանին՝ Մարդու իրավունքների եվրոպական դատարանի վճիռների մեկնաբանության հարցում: Այս մասին նշվել է սեպտեմբերի 30-ին ՀՀ վճռաբեկ դատարանի նախագահ Արման Մկրտումյանի եւ ԵԽ Մարդու իրավունքների քաղաքականության եւ համագործակցության բաժնի ղեկավար Միխայիլ Լոբովի հանդիպման ժամանակ:
Կարեւորելով Եվրոպայի խորհրդի հետ շարունակական համագործակցությունը՝ Արման Մկրտումյանը եւ Միխայիլ Լոբովը քննարկել են «Մարդու իրավունքների եվրոպական կոնվենցիայի եւ Մարդու իրավունքների եվրոպական դատարանի նախադեպային իրավունքի կիրառման ամրապնդումը Հայաստանում» ծրագրի շրջանակներում իրականացվող միջոցառումները եւ ապագա ծրագրերի շրջանակներում հնարավոր համագործակցության ուղղությունները:
Դատական դեպարտամենտի տարածած հաղորդագրության մեջ նշվում է, որ այս բաժնի բարեհաջող գործունեության դեպքում հնարավորություն կստեղծվի ներպետական մակարդակում ապահովել «Մարդու իրավունքների եւ հիմնարար ազատությունների պաշտպանության մասին» եվրոպական կոնվենցիայի արդյունավետ կիրառումը եւ նվազեցնել հետագայում ընդդեմ Հայաստանի կայացված վճիռների թիվը:
Ծրագրի շրջանակներում աշխատանքներ են իրականացվում «Դատալեքս» համակարգի որոնողական կարողությունների բարելավման, մասնավորապես՝ վճռաբեկ դատարանի որոշումների որոնման համակարգի կատարելագործման ուղղությամբ: