Թայվանական XYZ ընկերությունը մթերային 3D տպիչ է ստեղծել, որը կարող է ուտեստի բաղադրիչներ տպել, որոնք այնուհետեւ կեփվեն ջեռոցում։ Սարքը ներկայումս ի վիճակի է տպել այնպիսի ուտեստներ, ինչպիսիք են պիցցան, թխվածքաբլիթը եւ շոկոլադային տորթի զարդարանքները, եւ վերոհիշյալ ցուցակը աճում է։ Այսպես՝ պիցցան տպվում է ավանդական բաղադրիչների երեք շերտից, որոնք են խմորը, տոմատային սոուսը եւ պանրային սոուսը։
Տպիչը հնարավորություն է տալիս ծրագրավորված ուտեստներ պատրաստել կամ էլ տպագրության համար սեփական ֆայլերը ներբեռնել։ Սարքը նաեւ խոհարարների համար նախատեսված սենսորային էկրան ունի, որի միջոցով կարելի է հրահանգներ տալ։ Տպիչը կարող է տպագրական բաղադրիչների մինչեւ երեք քարթրիջ ներառել, որոնք հետո շերտերով փռվում են մագաղաթանման թղթի շերտերի վրա, ինչից հետո կարող են հանվել եւ եփվել ջեռոցում, փոխանցում է Kedem-ը։
Չնայած կարող են տարիներ անցնել, մինչեւ այդ տպիչները բավականաչափ մատչելի դառնան յուրաքանչյուր խոհանոցում տեղ գտնելու համար, այնուամենայնիվ վերոհիշյալ տեխնոլոգիան կոչված է մոտ ապագայում մատչելի դառնալու Ասիայում։ Ակնկալվում է, որ XYZ-ի 3D տպիչը կօգտագործվի մեծ ծավալի արտադրանք տվող փռերում, մինչեւ խոհարարության սիրահարների տներում հայտնվելը։ Ներկայումս տպիչն ընդամենը հայեցակարգ է, բայց կանխատեսումների համաձայն այն կարժենա մոտ 2035 դոլար։