«Տաշիր Գրուպի» սեփականատեր Սամվել Կարապետյանը հաջողակ գործարար է եւ դրանից ելնելով, կարելի է հուսալ, որ «Հայաստանի էլեկտրական ցանցերում» արդյունավետ կառավարում կիրականացվի: Այս մասին NEWS.am-ի հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը:
«Հույս կարելի է ունենալ, որ որպես հաջողակ գործարար, Սամվել Կարապետյանն իր ընկերությունով ՝«Տաշիր Գրուպով», առավել արդյունավետ կառավարում կիրականացնի, քան եղել է մինչ այժմ եւ որպես մասնավոր սեփականատեր, որը բիզնեսից բավականին մեծ արդյունքներ է ունեցել, զերծ կմնա կոռուպցիոն մեխանիզմներից»,-ասաց Արմեն Մարտիրոսյանը՝ հավելելով, որ ինքը համոզված է, որ ՀԷՑ-ի հետ կապված խնդիրներն առաջացել են կոռուպցիոն մեխանիզմների պատճառով:
Արմեն Մարտիրոսյանի խոսքով՝ ՀՀ իշխանությունները կոռուպցիոն կապերով կապված են ՀԷՑ-ի ղեկավարության հետ եւ դա է պատճառը, որ այդքան մեծ պարտք է գոյացել:
«Եթե կա բիզնես, որտեղ վերադիրը կրկնակի է, այդ բիզնեսը չի կարող ուղղակի անհաջող լինել, չասեմ, որ պետք գերշահույթներ ստանա: Կարծում եմ՝ սա է խնդիրը եղել, որը բերեց ՀԷՑ-ը սնանկացմանը: Այս պարագայում, միակ բանը, որ պետք է սպասել, այն է, որ արդյունավետ կառավարում կլինի, հուսանք, որ հետագայում, երբ պարտքը կմարվի, էլեկտրաէներգիայի սակագինը կվերադառնա նախկինին»,-ասաց «Ժառանգություն» կուսակցության փոխնախագահը:
Ավելի վաղ տեղեկացրել էինք, որ Հանրային ծառայությունները կարգավորող հանձնաժողովն 2015թ. հոկտեմբերի 1-ին, ն որոշում կայացրեց «Հայաստանի էլեկտրական ցանցեր» ընկերության 100 տոկոս բաժնետոմսերը ռուսաստանաբնակ գործարար Սամվել կարապետյանին պատկանող «Տաշիր» ընկերությունների խմբին վաճառելու մասին: ՀԾԿՀ որոշումը կայացվել է «Ինտեր ՌԱՕ Հոլդինգ Բի. Վի.» ընկերության եւ «ՀԷՑ»-ի՝ սեպտեմբերի 15-ի եւ 25-ի հայտարարությունների հիման վրա:
«Ինտեր ՌԱՕ»-ի եւ «Տաշիր Գրուպի» միջեւ կնքված պայմանագրի համաձայն «ՀԷՑ»-ի 100 տոկոս բաժնետոմսերը վաճառվել են «Լիորմանդ Հոլդինգզ Լիմիթեդ» ընկերությանը: Գործարքի արժեքը չի հրապարկվում:
ՀՀ կառավարության առջեւ գործարքի երաշխավոր է հանդես եկել ռուսական «Կասկադ էներգացանցեր» ընկերությունը:
