ԼՂՀ Մարտակերտի շրջանում հայ գործարար Լեւոն Հայրապետյանի հովանավորած Սուվորովի եւ Մադաթովի անվան ռազմական ակադեմիայի շինարարությունը ժամանակավորապես դադարեցվել է ֆինանսական խնդիրների պատճառով: Այս մասին հայտնում են NEWS.am-ի աղբյուրները:
Մեր տեղեկություններով՝ Լեւոն Հայրապետյանն անձամբ է դադարեցրել ֆինանսավորումը: Սպասվում է, որ Հայրապետյանը շինարարությունը կվերսկսի, երբ նորից Արցախ գա:
Ի դեպ, Մոսկվայում ավելի քան 1 տարի կալանքի տակ գտնված եւ օրերս ազատ արձակված հայ գործարարի նկատմամբ քրեական հետապնդումը դեռեւս չի դադարեցվել:
Հիշեցնենք, որ երբ 2014թ. հուլիսին կալանավորվեց մոսկվայաբնակ Լեւոն Հայրապետյանը, խոսակցություններ էին պտտվում, թե այս ամենի հետեւում կանգնած է Ադրբեջանը, որն այս կերպ փորձում է խանգարել ծնունդով արցախցի գործարարին՝ աջակցել Արցախին եւ բարեգործություններ կատարել:
Ավելի վաղ NEWS.am-ը հայտնել էր, որ 2014թ.-ի հուլիսի 24-ին Ռուսաստանի Դաշնության Քննչական կոմիտեն հայ գործարար Լեւոն Հայրապետյանին մեղադրանք է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով: Սեպտեմբերի 12-ին Լեւոն Հայրապետյանին եւս մեկ մեղադրանք է առաջադրվել մեքենայության հոդվածով: Հոկտեմբերի 3-ին Մոսկվայի Բասմանի դատարանը փոխել է «Բաշնեֆտի» գործի ֆիգուրանտ, հայտնի հայ գործարար Լեւոն Հայրապետյանի խափանման միջոցը՝ կալանավորումը փոխարինելով տնային կալանքով:
