Մալայզիան կարող է համաձայնագիր ստորագրել Ավստրալիայի, Բելգիայի, Նիդեռլանդների ու Ուկրաինայի հետ ՝ Դոնբասում Boeing -ի վթարի մեղավորներին պատասխանատվության կանչելու համար սեփական տրիբունալ ստեղծելու մասին: Ինչպես հոկտեմբերի 3-ին հայտնել է Bernama գործակալությունը, նման հնարավորությունը չի բացառել նաեւ երկրի վարչապետ Նաջիբ Ռազակը, լրագրողներին պատմելով ՄԱԿ-ի Գլխավոր վեհաժողովին իր մասնակցության մասին:
«Նյու Յորքում ես հանդիպել եմ չորս պետությունների իմ գործընկերներին ու նրանց հետ քննարկել այլընտրանքային միջոցառումներ, քանի որ Մալայզիան համաշխարհային համայնքին խոստացել է մեղավորների նկատմամբ արդարադատություն ապահովել »,- ասել է կառավարության ղեկավարը: Նրա խոսքով «գոյություն ունի երկու ճանապարհ. Առաջինը երկրներից մեկում արդարադատություն ապահովելն է, երկրորդը՝ հինգ պետությունների մասնակցությամբ միջազգային տրիբունալի ստեղծումը»,- հայտնում է «ՏԱՍՍ»-ը:
Վարչապետը նաեւ նշել է, որ բոլոր հինգ պետությունները «միասնական դիրքորոշում ունեն այս սարսափելի հանցագործության համար մեղավորներին պատասխանատվության կանչելու անհրաժեշտության հարցում»:
«Չնայած ՄԱԿ-ի Անվտանգության խորհրդում քվեարկության ժամանակ տրիբունալի ստեղծման բանաձեւի վրա վետո է դրվել, բայց դա ոչ մի կերպ չի անդրադառնում արդարադատություն ապահովելու մեր ծրագրերի վրա»,- ասել է վարչապետը:
Նա նաեւ նշել է, որ «Մալայզիայում սպասում են Ուկրաինայում Boeing-ի վթարի պատճառների մասին Նիդերլանդների անվտանգության խորհրդի զեկույցի հրապարակմանը, որը հասանելի կլինի հոկտեմբերի 13-ից»: