Եմենը փակում է Իրանում իր դեսպանատունը՝ դրանով բողոքելով իր ներքին գործերին Թեհրանի միջամտության դեմ: Այս մասին հայտնում է «ՏԱՍՍ»-ը ՝ վկայակոչելով France-Presse գործակալությունը:
Եմենի իշխանությունները, գործակալության տվյալներով, Իրանին մեղադրել են «մի շարք թշնամական գործողությունների հետեւանքով ինքնիշխանությունը խախտելու» մեջ: Եմենում զինված հակամարտության ամբողջ ընթացքում այդ երկրի իշխանությունները բազմիցս մեղադրել են Թեհրանին, ասելով իբրեւ նա աջակցում է շիա ապստամբ հուսիներին, որոնց դեմ պայքարում են Եմենի կառավարական ուժերը:
France-Presse-ի տվյալներով, Եմենի նախագահ Աբդ Ռաբբո Մանսուր Հադիի աշխատակազմի ներկայացուցիչը նույնպես հայտարարել է «Եմենում Իրանի դեսպանին երկրից արտաքսելու» մասին: Սակայն, նկատում է գործակալությունը, Իրանի դեսպանատունը գտնվում է մայրաքաղաք Սանայում, որը վերահսկում են շիա խռովարար հոուսիտները:
Ուրբաթ Եմենի Aden-TV կառավարական հեռուստաալիքը հայտնել էր, որ Եմենի կառավարությունը խզել է Իրանի հետ դիվանագիտական հարաբերությունները:
Նախագահ Աբդ Ռաբբո Մանսուր Հադիին հավատարիմ ջոկատներին աջակցություն ցուցաբերող արաբական կոալիցիայի Ռազմածովային ուժերը չորեքշաբթի Արաբական ծովում ձերբակալել են զենք տեղափոխող իրանական նավ, որն ուղեւորվում էր Եմենի ափեր:
Արաբական լրատվամիջոցների տեղեկություններով, ձկնորսական նավում հայտնաբերված հակատանկային լիցքերն ու հրթիռները, ինչպես նաեւ դրանց բանեցման երեք սարքավորումները նախատեսված էին հուսիների համար: Թեհրանն էլ իր հերթին հերքել է այդ զենքի փոխադրմանն իր առնչության վերաբերյալ մեղադրանքները: