«Ոտքի՛ Հայաստան» քաղաքացիական նախաձեռնությունը կարծում է՝ Սահմանադրական փոփոխությունների նախագծի դեմ ձեւավորված «Ո՛չ»-ի ճակատը հաջողության չի հասնի անհրաժեշտ քաղաքական ծրագրի բացակայության պատճառով:
NEWS.am-ի հետ զրույցում «Ոտքի՛ Հայաստան» շարժման առաջնորդներից Անդրիաս Ղուկասյանը նշեց, որ հենց այդ պատճառով են իրենք ձեռնպահ մնացել «Ո՛չ»-ի ճակատին միանալուց, չնայած որ վերջինները կարեւոր քարոզչություն են իրականացնում:
««Ոտքի՛ Հայաստան» շարժումն ի սկզբանե այդ ծրագրի մեջ չի տեսել հաջողության անհրաժեշտ նախադրյալներ: Մեր կարծիքով՝ չկա որեւէ նախադրյալ, որ մեր երկրում քվեարկությունը կարող է ազնիվ անցնել: Մենք փորձում ենք ամեն կերպ աջակցել նրանց, սակայն նրանք բավարար գործողություններ չեն անում եւ լուրջ քաղաքական ծրագիր չունեն մեր երկրում էական փոփոխություններ իրականացնելու համար»,-ասաց Անդրիաս Ղուկասյանը՝ պարզաբանելով, թե ինչու շարժման առաջնորդները հոկտեմբերի 2–ին ներկա չէին Երեւանում «Ո՛չ»-ի ճակատի առաջին հանրահավաքին եւ երթին:
Այնուամենայնիվ, Անդրիաս Ղուկասյանը նշեց, որ «Ոտքի՛ Հայաստան» շարժման հանրային խորհրդի անդամները եւ մասնակիցները ներկա են եղել եւ հանրահավաքին, եւ երթին:
«Ոտքի՛ Հայաստան» շարժումը փոխարենը միացել է «Հանրային փրկության» ճակատին, որը որդեգրել է քաղաքացիական անհնազանդությունների միջոցով իշխանափոխություն իրականացնելու քաղաքականություն:
«Հանրային փրկության» ճակատն իր առջեւ դրել է ավելի հանրօգուտ քաղաքական նպատակ, այն է՝ հասնել իշխանափոխության, եւ այդ կերպ կասեցնել նոր սահմանադրության ընդունման ծրագիրը, ինչպես նաեւ անհրաժեշտ պայմաններ ստեղծել մեր երկրում լեգիտիմ իշխանություն ձեւավորելու համար»,-ասաց Ղուկասյանը:
Նշենք, որ երեկ՝ հոկտեմբերի 2-ին, Երեւանի Ազատոթյան հրապարակում տեղի ունեցավ Սահմանադրական փոփոխությունների դեմ հանդես եկող քաղաքական եւ հասարակական ուժերից ձեւավորված «Ոչ»-ի ճակատի առաջին հանրահավաքը, ապա բողոքի երթը: «Չեք անցկացնի»-ին միացած քաղաքական ուժերի առաջնորդները հիմնականում Ազատության հրապարակում չէին. ՀԺԿ-ից ներկա էր Ստեփան Դեմիրճյանը, ՀԱԿ-ից` խմբակցության պատգամավորներ Արամ Մանուկյանն ու Գագիկ Ջհանգիրյանը, իսկ «Ժառանգությունից»՝ կուսակցության փոխնախագահ Արմեն Մարտիրոսյանը:
Հիշեցնենք, որ սահմանադրական բարեփոխումների դեմ հանդես եկող քաղաքական ուժերի ձեւավորած «Ոչ»-ի ճակատի առաջին հանրահավաքը տեղի է ունեցել Գյումրիում սեպտեմբերի 25–ին։ Նախաձեռնությանն են միացել «Ժառանգություն» կուսակցությունը, ՀԱԿ-ը, «Հիմնադիր խորհրդարանը», ՀԺԿ-ն,ԱԻՄ–ը եւ այլ քաղաքական ու հասարակական կազմակերպություններ:
Սահմանադրության նոր նախագիծը, որով նախատեսվում է անցում կառավարման խորհրդարանական համակարգի, արդեն ուղարկվել է ԱԺ: Հոկտեմբերի 5-ին նախագիծը կդրվի քվեարկության: Սպասվում է, որ հանրաքվեն կանցկացվի դեկտեմբերի առաջին տասնօրյակում:
