Սիսիանի բժշկական կենտրոնի ծննդաբերական բաժանմունքում 2014թ. հոկտեմբերի 25-ին մահացած 28-ամյա Անի Դավթյանի գործով ստացվել են դատաբժշկական երկրորդ փորձաքննության արդյունքները: Այս մասին NEWS.am-ին ասաց մահացածի մայրը՝ տիկին Ալվարդը` նշելով, որ երկրորդ փորձաքննության արդյունքները լրիվ տարբերվում են առաջինի արդյունքներից:
«Երկրորդ փորձաքննությամբ առաջին փորձաքննությանը լիովին հակասող արդյունքներ են եկել: Եթե առաջինի ժամանակ ասում էին` արգանդի պարանոցի բազմաթիվ պատռվածքների հետեւանքով է մահացել, ապա երկրորդի ժամանակ գրված է թոքերի եւ գլխուղեղի այտուցի հետեւանքով է մահ արձանագրվել: Հիմա ես հանձնաժողովային փորձաքննություն եմ պահանջել, որը դեռ տեղի չի ունեցել»,-ասաց տիկին Ալվարդը:
28-ամյա կնոջ մայրը պնդում է՝ դստեր մահվան մեջ միակ մեղավորները բժիշկներն են. «Ոչ մի բժիշկ մինչեւ հիմա չի պատժվել, շարունակում են աշխատել։ Մենք չենք կարող իրենց դեմ պայքարել, այսքան ժամանակ չենք էլ լսել, որ որեւէ գինեկոլոգ հղիի մահվան դեպքով պատժվի»:
Տիկին Ալվարդը, այնուամենայնիվ, վճռական է տրամադրված, պայքարելու է մինչեւ վերջ: Նա պատրաստվում է դիմում բողոքներ գրել ՀՀ Առողջապահության նախարարին, հանրապետության նախագահին, ՀՀ գլխավոր դատախազին եւ Քննչական կոմիտեի նախագահին։
Հիշեցնենք, որ ըստ Քննչական կոմիտեի մամուլի ծառայության՝ Անի Դավթյանը հիվանդանոց է տեղափոխվել 2014թ. հոկտեմբերի 24-ին, ժամը 14:00-ի սահմաններում, պտղաջրերի էմբոլիա ախտորոշմամբ, մահացել հաջորդ օրը՝ հոկտեմբերի 25-ին, ժամը 22:05-ի սահմաններում։
Դեպքի առթիվ հարուցվել է քրեական գործ։