«Իսլամական պետություն» խմբավորման ահաբեկիչները Սիրիայի կենտրոնում Պալմիրա քաղաքում պայթեցրել են հռոմեական դարաշրջանի Հաղթական կամարը: Այս մասին «Սպուտնիկ» գործակալությանը հայտնել է ՍԱՀ պատմական թանգարանների ու մշակութային ժառանգության տնօրեն Մաամուն Աբդել Քարիմը:
Տնօրենի խոսքով, ականատեսները տեսել են, թե ինչպես են գրոհաինները ականապատում կամարը մեծ քանակությամբ պայթուցիկ նյութերով: «Այն ինչին մենք այսօր ականատես ենք լինում, վկայում է մտածված սցենարի մասին, որով Պալմիրա քաղաքը կջնջվի երկրի երեսից»,- ասել է Աբդել Քարիմը:
Սիրիական աղբյուրը հայտարարել է, որ Պալմիրայի փրկության հույս կա, եթե սիրիական բանակը անհապաղ հարձակման անցնի ու ազատագրի քաղաքը՝ Ռուսաստանի օդատիեզերական ուժերի օդանավերի աջակցությամբ:
Քսանմետրանոց Հաղթական կամարը կառուցվել է Ք.հ 2-րդ դարում՝ Սեպտիմիուս Սեվեր կայսրի օրոք: Ինչպես ամբողջ քաղաքը, այն նույնպես կառուցված է հռոմեական ոճով: Կամարի գագաթին այն կայսրի անունն է փորագրված, որի կարգադրությամբ սկսվել էր շինարարությունը:
Այս տարվա օգոստոսին ԻՊ գրոհայինները պայթեցրել են Պալմիրայի Բաալ Շամին հինավուրց տաճարը:
