Արցախում սեպտեմբերի 25-ին հակառակորդի հրետակոծության հետեւանքով վիրավորված զինծառայողներից 7-ի վիճակն էլ կայուն է: Այս մասին NEWS.am-ի թղթակցի հետ զրույցում ասաց ՀՀ ՊՆ կենտրոնական զինվորական կլինիկական հոսպիտալի պետ Արամ Ասատուրյանը:
«Միայն մեկն է այս պահին Վերակենդանացման բաժանմունքում, սակայն նրա վիճակն էլ է կայուն, այսօր կտեղափոխվի հիվանդասենյակ»,- ասաց Արամ Ասատուրյանը՝ նշելով, որ սեպտեմբերի 25-ին վիրավորված մյուս 9 զինծառայողները բուժումը շարունակում են Ստեփանակերտի եւ Մարտակերտի հոսպիտալներում:
Հիշեցնենք, որ Երեւան էին տեղափոխվել այն զինծառայողները, որոնց վիճակը կայուն ծանր էր:
Ավելի վաղ NEWS.am-ը հայտնել էր, որ սեպտեմբերի 25-ին ժամը 17:30-ի սահմանում, ադրբեջանական զինուժի կողմից թուրքական արտադրության TR-107 կայանքներից հրթիռահրետանային արկակոծման էր ենթարկվել ՊԲ-ի հյուսիս-արեւելյան ուղղությամբ տեղակայված զորամասերից մեկի պահպանության տեղամասը, ինչի հետեւանքով մահացու վիրավորվել էին ՊԲ զինծառայողներ Նորայր Միքայելի Խաչատրյանը (ծնված 1995թ.), Ռոբերտ Սուրենի Մկրտչյանը (ծնված 1995թ.), Հարութ Մաքսիմի Հակոբյանը (ծնված 1997թ.) եւ Կարեն Գեւորգի Շահինյանը (ծնված 1997թ.): Կա 16 վիրավոր:
Դեպքի առթիվ հարուցվել է քրեական գործ: