Քանի որ սահմանադրական բարեփոխումները պարզ հարց չեն, առաջարկում եմ հետաձգել քվեարկությունը։ Այդ մասին Ազգային Ժողովի հոկտեմբերի 5-ին հայտարարել է ընդդիմադիր պատգամավոր Խաչատուր Քոքոբելյանը։

Նրա խոսքով, սա այն փաստաթուղթը չէ, որ միանգամից ընդունվի։ «Առաջարկում եմ մեզ ժամանակ տալ՝ փոփոխություններին ծանոթանալու համար եւ դրանից հետո միայն քվեարկություն անցկացնել։ Խնդրում եմ քվեարկությունը տեղափոխել վաղվան», - ասել է Քոքոբելյանը։

Սակայն խորհրդարանի խոսնակ Գալուստ Սահակյանը նշել է, որ կանոնակարգով դա նախատեսված չէ։ «Փաստաթուղթը ձեզ մոտ է,  դուք ժամանակ ունեք մինչեւ քվեարկությունը դրան ծանոթանալու»,-ասել է նա:

Դրա հետ կապված դժգոյություն է հայտնել նաեւ խորհրդարանական «Օրինաց երկիր» խմբակցության պատգամավոր Հովհաննես Մարգարյանը՝ հայտարարելով, որ իրենց թերթիկ են տվել, բայց իրենց հայտնի չեն այն բոլոր փոփոխությունները, որոնք պիտի մտցվեն խորհրդարանական  քննարկումների արդյունքում։

Մեկ ուրիշ ընդդիմադիր պատգամավոր՝ Հրանտ Բագրատյանը, հայտարարել է, որ սահմանադրական փոփոխությունների նախագծի վերաբերյալ ավելի քան հարյուր դիտարկում է ներկայացրել, սակայն դրանցից ոչ մեկը հաշվի չի առնվել։ Նրա կարծիքով դա վկայում է այն մասին, որ բոլոր հանդիպումներն ու քննարկումներն ձեւական բնույթ են կրել։