Վարչախմբի կողմից նախաձեռնած սահմանադրության փոփոխության համար չկա հանրային պահանջարկ եւ ժամանակավրեպ է: Այս մասին հայտարարություն է տարածել «Ժողովրդավարական Հայրենիք» կուսակցության քաղաքական խորհուրդը:
Հայտարարությունում նաեւ ասվում է.
«Ավելին` պատվիրատուն Սերժ Սարգսյանն է, որով լուծվում է իր եւ իրենց կլանի կողմից վերստին իշխանությունն ուզուրպացնելու խնդիրը, որին, ինչպես միշտ, աջակցել եւ շարունակում են աջակցել Հանրապետական խունտան, նրա կցորդ կուսակցությունները` նպատակ ունենալով ապահովել իրենց սանձարձակ եւ ցոփ կենսակերպի շարունակելիությունն ի հաշիվ Հայաստանի քաղաքացիների:
Վերոհիշյալ այսպես կոչված խունտան վերջին 18 տարիների ընթացքում տարատեսակ «քաղաքական» աճպարարությամբ Հայաստանը հասցրեցին համընդհանուր փլուզման շեմին` բարոյահոգեբանական մթնոլորտը հասցնելով պետական անվտանգությունը վտանգելու եզրագծին, որը հղի է անդառնալի հետեւանքներով :
Ցավոք, խունտային սպասարկելու եւ բաղրամյան 26-ի հաճախորդ դառնալու հայտ են ներկայացրել երբեմնի ընդդիմադիր մեր գործընկերները:
«Ժողովրդավարական Հայրենիք» կուսակցությունը դեմ է սահմանադրության փոփոխությանը եւ մասնակցելու է այն գործընթացներին, որոնք կանխելու են հանրաքվեն, միաժամանակ օգտագործելով ընձեռնված հնարավորությունը եւ հարմար պահը` նախաձեռնելով վարչախմբի հեռացումը»:
Նշենք, որ այսօր՝ հոկտեմբերի 5-ին, ԱԺ-ում քվեարկության է դրվելու Սահմանադրության նոր նախագիծը, որը նախատեսում է անցում կատարել խորհրդարանական կառավարման համակարգի եւ ԱԺ-ի 100-տոկոսանոց համամասնական ընտրությունների: