Սաուդյան Արաբիան մեծացրել է իր նավթի գնորդներին տրամադրվող զեղչերը՝ պայքարելով նավթի շուկայում իր բաժինը պահպանելու համար։ Հոկտեմբերի 4-ին Saudi Aramco պետական ընկերության գնացուցակում Ասիային մատակարարվող նավթի գինը մեկ բարելի համար նվազել է 1.7 դոլարով։ Saudi Aramco-ն Սաուդյան Արաբիայից նավթ արտահանող հիմնական ընկերությունն է։
Ինչպես գրում է The Wall Street Journal-ը, այդպիսով համաշխարհային շուկա արտահանվող Սաուդյան Արաբիայի նավթը այժմ 1.6 դոլարով ավելի էժան կլինի, քան Դուբայի էմիրությունում արդյունահանվող նավթը։ Նախկինում սաուդյան նավթը 10 տոկոսով թանկ էր Դուբայի նավթից։ Saudi Aramco ընկերությունը նաեւ իջեցրել է Հեռավոր Արեւելքի երկրներ արտահանվող ծանր նավթի գինը։ Զեղչը կազմել է 2 դոլար մեկ բարելի դիմաց։ ԱՄն-ի համար սաուդյան նավթը էժանացել է 30 ցենտով։
Ինչպես գրում է Lenta.ru-ն, ավելի վաղ համանման զեղչեր էին արել նաեւ արաբական երկրների մյուս նավթային ընկերությունները։ Ընդ որում վերջին ամիսների ընթացքում Սաուդյան Արաբիայում նավթի արդյունահանման ծավալները հասել են օրական 10 մլն բարելի եւ գրեթե հավասարվել էին ռուսական նավթարտադրության ծավալներին։ Պարբերականը նշում է, որ սեպտեմբերին ռուսական ընկերությունները նավթի հանքահանման ծավալները հասցրել էին 10.74 մլն բարելի, ինչը ԽՍՀՄ ժամանակներից ի վեր ռեկորդային ցուցանիշ է։