CR2-ը եւ «Ամերիաբանկը» Հայաստանում հեռահար բանքինգի նոր չափանիշներ կառաջարկեն։ Այս մասին հոկտեմբերի 5-ին՝ Երեւանում «Ամերիաբանկ» ՓԲԸ-ի գլխավոր տնօրեն Արտակ Հանեսյանի հետ համագործակցության մասին համաձայնագրի ստորագրումից հետո, ասաց CR2 ընկերության առեւտրական տնօրեն եւ կառավարման խորհրդի անդամ Կյերան Կիլկուլենը։
Կիլկուլենը ասել է, որ «Ամերիաբանկի» հետ համագործակցելու որոշումը կայացվել է 2 տարվա բանակցությունների արդյունքում, որոնց ընթացքում բանկը իրեն դրսեւորել է որպես վստահության արժանի եւ հեռանկարային գործընկեր։
«Մենք աշխատում ենք ավելի քան 60 երկրներում, մենք հաճախորդների լավ բազա ունենք։ Սակայն նոր երկրում առաջին նախագիծը միշտ յուրահատուկ է։ Հուսամ, մենք միասին կարող ենք Հայաստանում բանքինգի նոր չափանիշներ հաստատել՝ զարգացնելով ինքնասպասարկման միջոցները, ինտերնետ եւ բջջային բանքինգը»,- ասել է նա։
Արտակ Հանեսյանի խոսքով՝ CR2-ի միջոցով գործող նոր ծառայությունները հիմնականում կլրացնեն բանկի մասնաճյուղերը եւ կփոխարինեն դրանց։
«Առցանց ռեժիմով մեր հաճախորդներն անգամ կարող են փոխել իրենց քարտերի ծածկագրերը, տպել հաշվեհամարի տեղեկանքը եւ գումար փոխանցել։ Իհարկե, այդ ամենը կուղեկցվի անվտանգության ամենաժամանակակից չափանիշներով»,- նշեց Հանեսայանը։
Նա հավելեց նաեւ, որ նոր պլատֆորմը կընդլայնի բանկի հեռահար ծառայությունների շարքը ոչ միայն ֆիզիկական, այլ նաեւ իրավաբանական անձանց համար։
«Ամերիաբանկը» - իր ակտիվներով եւ վարկային պորտֆոլիոյով Հայաստանի ամենախոշոր բանկերից մեկն է։
CR2-ը ինտերնետ բանքինգի համակարգի առաջատար համաշխարհային մշակողներից մեկն է։