Միջազգային կազմակերպությունները հրշեջ բրիգադ չեն, ու նրանք չեն կարող տեղեկատվական գործակալությունների լրատվական թողարկումների ռեժիմով արձագանքել մեկ կամ երեք ժամում: Լրագրողների հետ զրույցում նման տեսակետ է արտահայտել Մոսկվայի միջազգային հարաբերությունների պետական համալսարանի Միջազգային հետազոտությունների ինստիտուտի եվրոատլանտյան անվտանգության կենտրոնի տնօրեն, ՀԱՊԿ գիտագործնական խորհրդի պրոֆեսոր Ալեքսանդր Նիկիտինը՝ Երեւանում խաղաղապահ գործունեության թեմայով միջազգային համաժողովի շրջանակում:
Պատասխանելով ղարաբաղյան հակամարտության գոտում իրավիճակի սրման կապակցությամբ ՀԱՊԿ-ի ուշացած արձաքանքի մասին NEWS.am-ի թղթակցի հարցին՝ փորձագետը նկատել է, որ միջազգային կազմակերպությունները հարթակներ են, որտեղ հանդիպում են երկրները: «Ոչ մի միջազգային կազմակերպություն չի կարող ավելի լավը կամ ավելի արագաշարժ լինել, քան դրանում ընդգրկված պետությունները: Որոշ միջազգային կազմակերպությունների քարտուղարություններն ավելի ակտիվ են, մյուսներում՝ օրինակ ՇՀԿ-ում քարտուղարությունն ունի շատ դանդաղ, կասեի նույնիսկ հանգիստ դիրքորոշում ու այս տեսակետից պետք է հասկանալ, որ միջազգային կազմակերպությունները հրշեջ բրիգադներ չեն ու չեն կարող տեղեկատվական գործակալությունների լրատվական թողարկումների ռեժիմով արձագանքել մեկ կամ երեք ժամում»,- նկատել է Ալեքսանդր Նիկիտինը:
Այս համատեքստում փորձագետը նշել է, որ որոշ դեպքերում արձագանքների զսպվածությունը նույնպես օգտակար է: «Օրինակ հիշեցնեմ, որ 2008 թ. ռուս վրացական պատերազմի ժամանակ՝ պատերազմական գործողությունների հինգ օրերին էլ ՆԱՏՕ-ն Բրյուսելում անընդհատ որոշում էր, թե ինչ դիրքորոշում է զբաղեցնելու ու անընդհատ ասում էր, որ «կսպասենք Վաշինգթոնի հայտարարությանը, իսկ հետո՝ երբ Վաշինգթոնի հայտարարությունը հնչեց, պատերազմն արդեն ավարտվել էր: Դրա համար էլ պետք է հասկանալ, որ հակամարտության դեպքում միջազգային կազմակերպությունների խնդիրը ոչ այնքան կողմերին օգնելն է, որքան իրավիճակը կայունացնելը, անհրաժեշտության դեպքում բանակցությունների համար հարթակ տրամադրելը, պետությունների ղեկավարների մակարդակ դուրս գալու համար հազվագյուտ հնարավորությունները օգտագործելը: Այս առումով ես, որպես վերլուծաբան, ճիշտ եմ համարում այն իրավիճակը, երբ միջազգային կազմակերպությունը նախ խորհրդակցում է ՄԱԿ-ի կամ ԵԱՀԿ –ի հետ, ու միայն դրանից հետո մշակում իր սեփական դիրքորոշումը՝ ենթատարածաշրջանային կազմակերպության շրջանակում: Չէ՞ որ ՀԱՊԿ-ը ոչ թե մայրցամաքային կամ տարածաշրջանային, այլ ընդամենը ենթատարածաշրջանային կազմակերպություն է:
Եվրասիական մայրցամաքում ունիվերսալ ներկայացվածություն ունեցող միակ կազմակերպությունը ԵԱՀԿ-ն է, դրա համար էլ գործիքների այն մեծ հավաքածուն, որը կա ՄԱԿ-ի, ԵԱՀԿ-ի, ՀԱՊԿ-ի տրամադրության տակ, պետք է դիտարկվի որպես գործիքների մեկ միասնական հավաքածու, ու յուրաքանչյուր դեպքի համար միանգամից ամբողջ հավաքածուն պետք չէ գործի դնել»,- նշել է Ալեքսանդր Նիկիտինը:
Հիշեցնենք, որ ղարաբաղյան հակամարտության գոտում նկատվող սրացումների կապակցությամբ ՀԱՊԿ-ի դիրքորոշումը կազմակերպության գլխավոր քարտուղար Նիկոլայ Բորդյուժան հայտնել է հոկտեմբերի 4-ին՝ անթույլատրելի անվանելով սահմաններին կատարվող իրադարձությունները ու Հայաստանի տարածքի գնդակոծություններն:
