Այսօրվանից սահմանադրական փոփոխությունների դեմ պայքարը մտնում է լուրջ փուլ: Այս մասին ասյօր՝ հոկտեմբերի 5-ին, Ազգային ժողովի դիմաց հավաքված՝ սահմանադրական փոփոխությունների դեմ պայքարող «Ոչ»-ի ճակատի բողոքի ակցիայի մասնակցներին ասացին ԱԺ ՀԱԿ խմբակցության ղեկավար Լեւոն Զուրաբյանը եւ քարտուղար Արամ Մանուկյանը (ֆոտոռեպորտաժ):
«Կասկած չկա, որ այսօր խորհրդարանի մեծամասնությունը, մոռանալով հայրենիքի եւ պետականության շահը, կողմ կքվեարկի, բայց դա չի նշանակում, թե ամեն ինչ վերջացավ, ամեն ինչ դեռ նոր է սկսվում»,- հայատարարեց Արամ Մանուկյանը:
Անդրադառնալով քիչ առաջ Ազգային ժողովի առջեւ տեղի ոնեցած՝ ոստիկանների հետ բախումներին, որի ընթացքում, ակտիվիստների տվյալով, 17 մարդ բերման ենթարկվեց, Լեւոն Զուրաբյանն ասաց, որ, փաստորեն, այդ պահից սկսեց գործել նոր Սահմանադրությունը, որով երկիրը ղեկավարում է «խուժանը»:
«Վալերի Օսիպյանի նման խուժանն այսօր ղեկավարում է ոստիկանության ստորաբաժանումները»,- ասաց նա՝ կոչ անելով բոլորին միանալ իրենց պայքարին:
Ակցիայի մասնակիցներն այս պահին ԱԺ շենքի առջեւ կանգնած սպասում են քվեարկության արդյունքներին: Ընդմիջումից հետո ԱԺ-ում քվեարկության կդրվի նոր Սահմանադրության նախագիծը: Ակցիայի մասնակիցները հայտարարում են, որ ԱԺ այսօրվա որոշմամբ իրենք սպառված կհամարեն պայքարի մյուս միջոցները եւ կապավինեն միայն փողոցային պայքարին:
Նշենք, որ ակտիվիստների խոսքով՝ Երեւանի փոխոստիկանապետ Վալերի Օսիպյանն այդպես էլ չի հիմնավորել, թե օրենքի որ կետի համաձայն են ակցիայի մասնակիցների բերման ենթարկել:
Հիշեցնենք, որ ոստիկանների եւ ակտիվիստների միջեւ բախումներ էին սկսվել այն ժամանակ, երբ ոստիկաններըփորձել էին ակտիվիստներին եւ նրանց փակցրած՝ «Ոչ» գրությամբ մեծ պաստառը իջեցնել ԱԺ-ի ճաղավանդակներից:
Այս պահին ակցիայի մասնակիցներն Ազգային ժողովի դիմաց կանգնած սպասում են Ազգային ժողովում Սահմանադրության նախագծի քվեարկության արդյունքներին:
Նշենք, որ «Ոչ»-ի ճակատը երեւանյան առաջին հանրահավաք-երթն անցկացրեց հոկտեմբերի 2-ին: Նախաձեռնությանն են միացել «Ժառանգություն» կուսակցությունը, ՀԱԿ-ը, «Հիմնադիր խորհրդարանը», ՀԺԿ-ն,ԱԻՄ–ը եւ այլ քաղաքական ու հասարակական կազմակերպություններ:
Սպասվում է, որ Սահմանադրության հանրաքվեն կանցկացվի դեկտեմբերի առաջին տասնօրյակում: