ԱԺ ՀԱԿ խմբակցության քարտուղար Արամ Մանուկյանի պատահաբար են փորձել բերման ենթարկել սահմանադրական փոփոխությունների դեմ այսօր` հոկտեմբերի 5–ին ԱԺ շենքի դիմաց ընթացող «Ոչ»–ի ճակատի բողոքի ակցիայի ժամանակ։ Այս մասին այսօր՝ հոկտեմբերի 5-ին, լրագրողներին ասաց Երեւանի փոխոստիկանապետ Վալերի Օսիպյանը՝ հավելելով, որ ոստիկանները պարտավոր չեն Արամ Մանուկյանի դեմքով ճանաչել (ֆոտոռեպորտաժ):
«Չգիտեմ, թե ինչպես էր հայտնվել ոստիկանական մեքենայում: Երեւի բերման ենթարկվածների հետ հայտնվել էր ոստիկանական մեքենայում: Ես նրան նկատելուց հետո առաջարկեցի իջնել, բայց նա հրաժարվում էր իջնել: Զգուշացրի, որ եթե չիջնի, ուժով կիջացնեմ: Եվ հետո, գիտեք ինչ, ոստիկանները պարտավոր չեն Արամ Մանուկյանին դեմքով ճանաչել»,-ասաց Վալերի Օսիպյանը՝ հավելելով, որ պատգամավորները նման դեպքերում պարտավոր են տարբերակիչ նշաններ կրել:
Երեւանի փոխոստիկանապետը, անդրադառնալով ոստիկանների եւ ցուցարարների միջեւ բախման ժամանակ ՀԱԿ պատգավոր Լեւոն Զուրաբյանի իրեն ուղղված «խուժան» որակմանը, նշեց, որ դա պատգամավորին ոչ վայել արտահայտություն է եւ պատգամավորն իրավունք չունի իրավապահ մարմնի ներկայացուցչին նման ձեւով դիմել:
«Պատգամավորը նման արտահայտություն անելուց առաջ պիտի մտածի, որ իր այդ արտահայտությունը կարող է օրինակ ծառայել մյուս քաղաքացիներին: Այս ամեն ինչն ավարտվելուց հետո նոր կմտածեմ, թե այս միջադեպի վերաբերյալ ինչ կարելի է անել»,-ասաց նա:
Վալերի Օսիպյանը չկարողացավ ասել, թե կոնկրետ քանի ցուցարար է բերման ենթարկվել ԱԺ-ի մոտից, սակայն հավաստիացրեց, որ նրանք 3 ժամ անց ազատ կարձակվեն:
Նշենք, որ ԱԺ-ի մոտից բերման է ենթարկվել մոտ 2 տասնյակ ցուցարարներ: ԱԺ–ն արդեն ընդունել է սահմանադրական բարեփոխումների նախագիծը հանրաքվեի դնելու մասին որոշումը
Նշենք, որ «Ոչ»-ի ճակատը հայտարարել է, որ մտադիր է պայքարը շարունակել փողոցում։ Նախաձեռնությանն են միացել «Ժառանգություն» կուսակցությունը, ՀԱԿ-ը, «Հիմնադիր խորհրդարանը», ՀԺԿ-ն,ԱԻՄ–ը եւ այլ քաղաքական ու հասարակական կազմակերպություններ: