Ազգային ժողովի շենքի դիմացից այսօր՝ հոկտեմբեր 5-ին, Ոստիկանության բաժին է բերման ենթարկվել Սահմանադրական փոփոխությունների դեմ պայքարող «Ոչ»-ի ճակատի բողոքի ակցիայի 21 մասնակից:
Այս մասին NEWS.am-ին հայտնեցին ոստիկանության լրատվության բաժնից:
Հիշեցնենք, որ ակտիվիստները բերման էին ենթարկվել ոստիկանների եւ ակցիայի մասնակիցների միջեւ բախումներից հետո: Բախումներն առաջացան այն ժամանակ, երբ ակցիայի մասնակիցները կանգնել էին Ազգային ժողովի ճաղավանդակներին եւ փորձում էին փակցնել «Ոչ» գրությամբ մեծ պաստառը:
Խառնաշփոթի մեջ ոստիկանները նույնիսկ ՀԱԿ պատգամավոր Արամ Մանուկյանին էին փորձել բերման ենթարկել։
Նշենք, որ Ազգային ժողովը քիչ առաջ ընդունեց «ՀՀ նախագահի համար ընդունելի առաջարկների հիման ՀՀ սահմանադրության փոփոխությունների նախագիծը հանրաքվեի դնելուն համաձայնություն տալու մասին» ԱԺ որոշման նախագիծը:
«Ոչ»-ի ճակատը մտադիր է պայքարը շարունակել փողոցում։
Նախաձեռնությանն են միացել «Ժառանգություն» կուսակցությունը, ՀԱԿ-ը, «Հիմնադիր խորհրդարանը», ՀԺԿ-ն, ԱԻՄ–ը եւ այլ քաղաքական ու հասարակական կազմակերպություններ: