ԱՊՀ երկրների եւ Արեւելյան Եվրոպայի ինստիտուտի տնօրեն, Ընտրական համակարգերի միջազգային կենտրոնի (Իսրայել) նախագահ Ալեքսանդր Ցինկերը հույս ունի, որ Լեռնային Ղարաբաղի հակամարտության գոտում իրավիճակի սրումը չի հանգեցնի խոշործավալ ռազմական բախումների։
NEWS.am-ի եւ ԱրմԻնֆոյի թղթակիցների հետ զրույցում իսրայելցի փորձագետը կարծիք է հայտնել, որ ներկայիս դեպքերը կապված են նրա հետ, որ ԵԱՀԿ Մինսկի խումբը գործնականում ոչինչ չի անում կամ էլ, ծայրահեղ դեպքում, նույնիսկ եթե ուզում է ինչ-որ բան անել, այնուամենայնիվ չի կարողանում։ «Երբ ինչ-որ գործընթաց ձգձգվում է, ինչ-որ փուլում կարող է ընդհատվել», - նկատել է Ալեքսանդր Ցինկերը։
Փորձագետը հիշեցրել է, որ Ադրբեջանում շուտով խորհրդարանական ընտրություններ տեղի կունենան, որոնցից առաջ իշխող կուսակցությունը կփորձի ցույց տալ, որ պատրաստ է ցանկացած հարց լուծել, այդ թվում նաեւ՝ այս հարցը, եւ եթե պետք լինի՝ ռազմական ճանապարհով։
«Հույս ունեմ, որ մինչեւ նոյեմբերի 1-ը ոչ մի խոշոր միջադեպ չի լինի, իսկ ընտրություններից հետո բռնկումները կսկսեն թուլանալ։ Բայց սա ազդանշան է այն մասին, որ Մինսկի խումբը պիտի գոնե կեսքայլեր գտնի, պիտի ջանա լուծում գտնել հակամարտության համար, որպեսզի կողմերից յուրաքանչյուրը հասկանա, որ կարելի է ընդառաջ գնալ իրար։ Երբ առկա է հակամարտություն, փոխզիջում է պետք», - նշել է փորձագետը։
Պատասխանելով միջնորդների հավասարակշռված եւ անհասցե հայտարարությունների մասին հարցին՝ Ալեքսանդր Ցինկերը նշել է, որ շատ հաճախ միջազգային ձեւաչափերը, որոնք իբր փորձում են որեւէ հարց լուծել, նման մոտեցում են նախընտրում։ «Ես Իսրայելի քաղաքացի եմ եւ սեփական փորձով գիտեմ, որ երբ կողմերից մեկը բացասական շարժում է անում, երբեք միայն մի կողմին չեն դատապարտում դրա համար։ Միջադեպ է տեղի ունեցել, դրան հաջորդում է հայտարարություն «խախտել են» ոգով, հետո հնչում է՝ «մենք դիմում ենք երկու կողմին էլ՝ զսպվածություն հանդես բերելու, հակամարտությունը չսրելու կոչով»։ Որովհետեւ, իմ կարծիքով, նման ձեւաչափերը սառեցված հակամարտություններ են ստեղծում եւ չեն փորձում լուծել դրանք»։
Իսրայելցի փորձագետը նաեւ զուսպ անվստահություն է հայտնել միջադեպերի հետաքննության մեխանիզմի ստեղծման վերաբերյալ։ «Կարծում եմ, ոչ մի մեխանիզմ էլ չի ստեղծվի։ Գուցե սխալվում եմ, բայց ես այնքան էլ չեմ հասկանում, թե դա ինչպես կարելի է կազմակերպել։ Դրա համար էլ կարծում եմ, որ չի ստեղծվի այնպիսի հանձնաժողով, որը փորձի միանշանակ ասել, որ միջադեպն այսպես է սկսվել, այս կողմն է մեղավոր, որովհետեւ հետեւյալ քայլերն է ձեռնարկել։ Իսկ եթե հանձնաժողով ստեղծվի, ապա ամենայն հավանականությամբ շատ մշուշոտ արտահայտություններ կհետեւեն դրան, իսկ ավարտն այսպիսին կլինի. «մենք երկու կողմին էլ կոչ ենք անում կատարել 1994-ի համաձայնագրի դրույթները եւ չլարել իրավիճակը»։ Դա առավելագույնն է, որ կարող է անել Մինսկի խումբը», - եզրակացրել է Ալեքսանդր Ցինկերը։