Սահմանադրական փոփոխությունների նախագիծը, որը հավանության է արժանացել ԱԺ-ւմ, առաջիկա 2 օրում կուղարկվի նախագահի հաստատմանը: Այս մասին NEWS.am-ի թղթակցի հետ զրույցում նշել է ՀՀԿ խմբակցության ղեկավար Վահրամ Բաղդասարյանը:
Նրա խոսքով, փոփոխությունների փաթեթը հավանության արժանացնելուց հետո նախագահը պետք է հանրաքվեի օր նշանակի, որը տեղի է ունենալու նախագահի հրամանագրից հետո 55-65 օրվա ընթացքում: Արդեն վաղը կամ հաջորդ օրը փաստաթուղթը կուղարկվի ՀՀ նախագահի հաստատմանը, եւ մոտ ժամանակներս երկրի ղեկավարը կհայտարարի հանրաքվեի օրը»,-ասել է Բաղդասարյանը:
Հիշեցնենք, որ Հայաստանի Ազգային ժողովն այսօր՝ հոկտեմբերի 5-ին, ընդունել է «ՀՀ նախագահի համար ընդունելի առաջարկների հիման ՀՀ սահմանադրության փոփոխությունների նախագիծը հանրաքվեի դնելուն համաձայնություն տալու մասին ԱԺ որոշման նախագիծը»: Որոշմանը կողմ է քվեարկել 104, դեմ՝ 10, ձեռնպահ` 3 պատգամավոր: Քվեարկության նման ելքը կանխատեսելի էր, հաշվի առնելով այն փաստը, որ Սահմանադրական բարեփոխումներին աջակցելու պատրաստակամություն էին հայտնել խորհրդարանական երեք ուժեր՝ իշխանական ՀՀԿ-ն, «Բարգավաճ Հայաստանը» եւ ՀՅԴ-ն:
Նախագծին կտրականապես դեմ են արտահայտվում ՀԱԿ-ն ու «Ժառանգությունը», համարելով որ այն սեփական վերարտադրությունը ապահովելու՝ իշխանությունների փորձն է:
Վերջնարդյունքում նախագծին դեմ են քվեարկել ՀԱԿ խմբակցությունը՝ բացառությամբ Լյուդմիլա Սարգսյանի, «Ժառանգությունց» Զարուհի Փոստանջյանը, ՕԵԿ-ից՝ Հեղինե Բիշարյանն ու Իշխան Խաչատրյանը եւ ԲՀԿ խմբակցությունից՝ Տիգրան Ուրիխանյանը:
