Հանցագործ աշխարհում «Քանաքեռցի Տույ» մականունով հայտնի Արթուր Ղազարյանին  1 տարվա ազատազրկման դատապարտելը որոշումը ակնհայտ խիստ պատիժ էր: NEWS.am-ի հետ զրույցում նման կարծիք հայտնեց Արթուր Ղազարյանի փաստաբան Երեմ Սարգսյանը՝ անդրադառնալով  դատարանի այսօրվա կայացրած որոշմանը: 

«Հաշվի առնելով պատիժը մեղմացնող հանգամանքները, անձը բնութագրող հատկանիշները, նաեւ նմանատիպ այլ քրեական գործերով կայացրած վճիռները, ակնհայտ խիստ պատիժ է նշանակվել իմ պաշտպանյալին»,-ասաց փաստաբանը:

Երեմ Սարգսյանը նշեց, որ դատավճիռը 5-օրյա ժամկետում ստանալուց եւ իր պաշտպանյալի հետ խորհրդակցելուց հետո կորոշեն՝ բողոքարկել դատարանի որոշումը Վերքննիչում, թե ոչ:

Ավելի վաղ տեղեկացրել էինք, որ Արթուր Ղազարյանի համար մեղադրող Վահե Ասատրյանը 1 տարի 6 ամիս ազատազրկում էր պահանջել: 

Արթուր Ղազարյանին մեղադրանք է առաջադրվել այն բանի համար, որ նա գործով չպարզված հանգամանքներում ապօրինի կերպով ձեռք է բերել եւ կրել հրազեն հանդիսացող «Վիկինգ» մոդելի 9մմ տրամաչափի գործարանային արտադրության ակոսափող ատրճանակ եւ ռազմամթերք հանդիսացող 9մմ/9X19/ տրամաչափի թվով 17 փամփուշտներ, որոնք նրա մոտ հայտնաբերվել են ՀՀ ոստիկանության Կենտրոնականի բաժնում կատարված անձնական խուզարկության ժամանակ: Արթուր Ղազարյանը քրեական շրջանակներում հայտնի է որպես «Քանաքեռցի Տույ»։