Ֆրանսիայի Ստրասբուրգ քաղաքում հոկտեմբերի 4-ին հարյուրավոր հայեր մասնակցել են Թուրքիայի նախագահի այցի դեմ բողոքի ակցիային, քանի որ մեկ շաբաթ առաջ թուրք դպրոցականները կտտանքների էին ենթարկել հայ դպրոցականի։ Այս մասին NEWS.am-ի թղթակցի հետ զրույցում հայտնեցին Ստրասբուրգի «Հայորդի» երիտասարդաց միությունից, որը նույնպես մասնակցել է ակցիային։
«Ի բողոք Էրդողանի այցի՝ Ստրասբուրգի քրդերը եւ հայերը բողոքի ցույց էին կազմակերպել: Հայկական կողմի ցուցարարների թիվը հասնում էր 1400-ի, մեր նպատակն էր պահանջել Էրդողանից ու նրա շրջապատից՝ անհապաղ դադարեցնել ճնշումները Թուրքիայի Հանրապետությունում բնակվող հայերի նկատմամբ եւ վերջ դնել թուրք-քրդական բախումների ֆոնին հնչեցվող հակահայկական կոչերին: Բողոքի ցասումը հայերի մոտ առաջացել էր այն բանից հետո, երբ մեկ շաբաթ առաջ երկու թուրք անչափահաս տղաներ` մոտ 10-11 տարեկան, ոգեւորված հակահայկական կոչերից, դպրոցում կտտանքների էին ենթարկել եւ անպատվել մի հայ դպրոցականի»,- ասացին միությունից։
Նրանց փոխանցմամբ՝ իրենք ցույցի մասնակցել են Ցեղասպանության վերաբերվող պաստառներով, որոնց վրա գրված է եղել «1915-2015․ մեր վերքերը դեռ բաց են»։
