Հավաքական անվտանգության պայմանագրի կազմակերպությունում Հայաստանի նախագահության առաջնայնություններից է կառույցի խաղաղապահ կարողությունների զարգացումը։ Այդ մասին ասել է արտգործնախարար Էդվարդ Նալբանդյանը ՄԱԿ-ի գլխավոր քարտուղարի խաղաղապահական գործողությունների հարցերով օգնական Էդմոն Մյուլեի հետ հանդիպմանը:
Ողջունելով հյուրին՝ նախարար Նալբանդյանը կարեւորեց ՄԱԿ-ի առաջնորդող դերակատարությունը աշխարհում խաղաղության եւ անվտանգության պահպանման գործում՝ ընդգծելով, որ Հայաստանը մեծ կարեւորություն է տալիս խաղաղապահության իր ներգրավվածությանն ու հետեւողականորեն ամրապնդում է համապատասխան կարողությունները:
Շնորհակալություն հայտնելով ընդունելության համար՝ Էդմոն Մյուլեն արձանագրեց, որ աշխարհում հակամարտությունների թվի աճին զուգընթաց ավելացել է խաղաղապահ առաքելությունների անհրաժեշտությունը:
Հանդիպմանն անդրադարձ արվեց խաղաղապահ առաքելություններում Հայաստանի մասնակցությանը։ Այդ համատեքստում ՄԱԿ-ի բարձրաստիճան պաշտոնյան բարձր գնահատեց Հայաստանի ներդրումը տարբեր երկրներում խաղաղության աջակցության ուժերին։ Նախարար Նալբանդյանը նշեց, որ նախկինում եւ ներկայում խաղաղապահ առաքելություններին Հայաստանի մասնակցության աշխարհագրությունը՝ Կոսովո, Իրաք, Աֆղանստան, Լիբանան, Մալի, վկայում է այն կարեւորության մասին, որ տալիս է Հայաստանը աշխարհում խաղաղության պահպանմանը։ Նա շեշտեց, որ Հայաստանը շնորհակալ է Միացյալ Նահանգներին, Հունաստանին, Իտալիային եւ Գերմանիային Հայաստանի խաղաղապահ կարողությունների զարգացմանը ցուցաբերված աջակցության համար:
Էդվարդ Նալբանդյանն ընդգծեց, որ Հավաքական անվտանգության պայմանագրի կազմակերպությունում Հայաստանի նախագահության առաջնայնություններից է կառույցի խաղաղապահ կարողությունների զարգացումը: Այդ առումով նախարարը կարեւորեց ՀԱՊԿ-ի փոխգործակցությունը Միավորված Ազգերի Կազմակերպության խաղաղապահության տնօրինության հետ՝ 2012թ. ստորագրված Հուշագրի շրջանակներում:
Զրուցակիցները մտքեր փոխանակեցին Նյու Յորքում ս.թ. սեպտեմբերի 28-ին կայացած Խաղաղապահության հարցերով առաջնորդների գագաթաժողովի արդյունքների վերաբերյալ։ Այդ համատեքստում ՄԱԿ-ի գլխավոր քարտուղարի օգնականը կարեւորեց Հայաստանի Նախագահի մասնակցությունը վերոհիշյալ գագաթաժողովին։
