ԱԺ ՀԱԿ խմբակցության քարտուղար Արամ Մանուկյանը սահմանադրական փոփոխությունների դեմ «Ոչ»-ի ճակատի բողոքի ակցիայի ժամանակ հոկտեմբերի 5–ին Ազգային ժողովի դիմացից իրեն բերման ենթարկելը պատահականություն չի համարում։ NEWS.am-ի հետ զրույցում Արամ Մանուկյանը ծիծաղելի անվանեց Երևանի փոխոստիկանապետ Վալերի Օսիպյանի մեկնաբանությունը, թե իբր ոստիկանները պատգամավորին չճանաչելով են ոստիկանական մեքենա նստեցրել։
«Ինձ ոստիկանները ոչ թե փորձել են բերման ենթարկել, այլ 6 հոգով հենց բերման են ենթարկել, սա վերաբերմունք է, սա պատահականություն չէ։ Հետո տեսան, թե ինչ հիմարություն են անում, սկսեցին հակառակն անել։ Ոստիկաններն ինձ շատ էլ լավ ճանաչում են, Երևանում շուն ու կատու չկա, որ ինձ չճանաչի, ո՞նց կարող է ոստիկանն ինձ չճանաչի, երբ ամեն օր ինձ հետ շփվում է։ Նրանք զգացին, թե ինչ են անում, հասկացան, որ կարող է ծանր անդրադառնալ իրենց վրա, թեպետ արդեն ծանր է անդրադարձել»,-ասաց Արամ Մանուկյանը։
Ինչպես ավելի վաղ հաղորդել էր NEWS.am-ը՝ հոկտեմբերի 5-ին, բախումներ էին տեղի ունեցել ոստիկանների եւ Ազգային ժողովի դիմաց բողոքի ակցիա անցկացնող ակտիվիստների միջեւ: Ոստիկանները թույլ չէին տվել Ազգային ժողովի ճաղավանդակ- պարսպին ամրացնել «Ոչ» գրությամբ մեծ պաստառը: Սկսվել էր քաշքշուք, ոստիկանները բերման էին ենթարկել 17 մարդու, փորձել էին բերման ենթարկել նաև ՀԱԿ ԱԺ խմբակցության քարտուղար Արամ Մանուկյանին:
Ավելի ուշ բերման ենթարկված բոլոր ակտիվիստներն ազատ էին արձակվել։