Ղարաբաղյան հակամարտությունում սպառնալիքների մասով մեծագույն վտանգը Ռուսաստանի եւ ԵԱՀԿ Մինսկի խմբում նրա արեւմտյան գործընկերների միջեւ հարաբերությունների լիարժեք խզումն է: Այս մասին NEWS.am-ի թղթակցի հետ զրույցում հայտարարեց Հակամարտությունների հետազոտության եւ վերլուծության բրիտանական անկախ կենտրոնի տնօրեն Քրիստոֆեր Լենգթոնը: Նա նաեւ պարզաբանեց ադրբեջանական իշխանությունների արկածախնդրային գործողությունների հնարավոր պատճառներն ու կանխատեսումներ արեց ղարաբաղյան հակամարտության գոտում մարտական գործողությունների վերսկսման հնարավորության վերաբերյալ:

Հայաստանի Զինված ուժերը հոկտեմբերի 1-ին կանխեցին Ադրբեջանի ԶՈՒ-ի կողմից Նախիջեւանի ուղղությամբ պետական սահմանը խախտելու փորձը: Սեպտեմբերի 24-ին ադրբեջանական զինուժն ինտենսիվ կրակ բացեց Հայաստանի Տավուշի մարզի սահմանամերձ գյուղերի ուղղությամբ: 3 խաղաղ բնակիչ զոհվեց: Սեպտեմբերի 24-ին էլ Ադրբեջանի զինուժի գործողությունների արդյունքում ԼՂՀ Պաշտպանության բանակի 4 զինծառայող զոհվեց: Ինչո՞վ եք պայմանավորում ադրբեջանական կողմի այս ապակառուցողական քայլերը:

Աշխարհում բազմաթիվ հակամարտող կողմեր ձգտում են փորձության ենթարկել հակառակորդին եւ օգտվել միջազգային թատերաբեմում անկայունությունից: Պատճառները տարբեր կարող են լինել: Դրանցից մեկն էլ Ռուսաստանի եւ Արեւմուտքի միջեւ բարդ հարաբերություններն են:

Ձեր կարծիքով, ի՞նչն է խանգարում միջազգային հանրությանը՝ ադրբեջանական ռազմաքաղաքական ղեկավարության այդպիսի անհեռանկարային քաղաքականությունը կանխելու համար, որը կարող է հանգեցնել ղարաբաղյան հակամարտության գոտում լայնածավալ մարտական գործողությունների վերսկսման:

Այս դեպքում էական է միջազգային շրջանակում կառուցողական երկխոսության վերականգնումը: Բայց այդ նպատակը կա նաեւ հակամարտող կողմերի հայտարարված մտադրություններում՝ հակամարտությունը լուծել խաղաղ ճանապարհով եւ փոխզիջման ոգով:

Պատերազմի վերսկսման հավանականություն տեսնո՞ւմ եք:

Միշտ էլ մարտական գործողությունների վերսկսման հավանականություն կա. կարճատեւ պատերազմի, ինչպես եղել է տարիներ շարունակ: Այդ տեսանկյունից, սպառնալիքների մասով մեծագույն վտանգը Ռուսաստանի եւ ԵԱՀԿ Մինսկի խմբում նրա արեւմտյան գործընկերների միջեւ հարաբերությունների լիարժեք խզումն է:

Զրուցեց Տաթեւիկ Ղազարյանը