Արարատի մարզի Քաղցրաշեն գյուղում երկու ֆերմերներ խաղողի բերքը թափել են հենց ճանապարհի վրա: Ֆերմերներից Անդրանիկ Մովսիսյանը NEWS.am-ի թղթակցին պատմեց, որ գյուղացիները հոկտեմբերի 1-5-ը խաղողով լի մեքենաներով կանգնել են գործարանի դարպասների մոտ:
«Չորս օր արեւի տակ խաղողը պահելուց հետո ի՞նչ կլինի: Հյութը տակից դուրս հոսեց: Նրանք այդ ջուրը վերցրեցին որպես փորձանմուշ եւ ասացին՝ թթվել է: Ասում եմ՝ գոնե վերեւից վերցրեք: Ասացին՝ չենք վերցնի, հետ գնա... Ի՞նչ անեմ: Հետ գնացի, 200 մետր անցա եւ 7 տոննան թափեցի ճանապարհին»,- պատմեց խաղողագործը:
«Մի քանի օր առաջ Արարատի մարզպետը գործարան եկավ: Ձեւի համար նրա մոտ մի քանի մեքենա ընդունեցին 110-120 դրամով, իսկ հետո՝ նորից. ոմանցից կիլոգրամը 50 դրամով, ոմանցից՝ 70-ով: Իսկ եթե համաձայն չես կամ վիճում ես, կարող ես գնալ: Կամ էլ օրերով կսպասեցնեն, ինչպես մեզ, մինչեւ բերքը փչանա»,- ասաց Մովսիսյանը:
«Որդիս պայմանագրային զինծառայող է, Ղարաբաղում սահմանն է պաշտպանում: Կզանգի, կհարցնի՝ ինչպե՞ս են գործերը: Չգիտեմ՝ ինչ պատասխանեմ նրան»,- հավելեց նա:
Նշենք, որ Քաղցրաշենի գինու գործարանը պատկանում է գործարար եւ պատգամավոր Կարո Կարապետյանին (ով հայտնի է Յուվեցի Կարո անունով), որը նախկինում ԲՀԿ-ից, իսկ հիմա «Բարգավաճ Հայաստան» խմբակցության անդամ է եւ անկուսակցական: