Երեւանի Դավիթ Անհաղթ փողոցի 14/24 հողակտորում սեպտեմբերի 7-ին շինարարական ինքնաշեն բեռնատար վերելակի պոկվել- ընկնելու դեպքով հարուցվել է քրեական գործ:
NEWS.am-ի հարցմանն ի պատասխան Քննչական կոմիտեի դեպարտամենտի տեղեկատվության եւ հասարակայնության հետ կապերի բաժնից հայտնել են, որ սեպտեմբերի 7-ին ինքնաքարշի ընկնելու հետեւանքով երկու անձի առողջությանը ծանր վնաս պատճառվելու դեպքի առթիվ հարուցվել է քրեական գործ Քրեական օրենսգրքի 157-րդ հոդվածի 1-ին մասի հատկանիշներով:
Քննություն է տարվում՝ պարզելու վթարի պատճառները, քրեական գործով էական նշանակություն ունեցող մի շարք հանգամանքների պարզաբանման նպատակով նշանակվել է դատատեխնիկական փորձաքննություն, որի եզրակացությունը դեռեւս չի ստացվել:
Նախաքննությունը շարունակվում է:
Հիշեցնենք, որ 46-ամյա Սարգիսն ու 60-ամյա Պարույրը վերելակը փորձարկելիս են եղել, երբ գետնից մոտ 20 մետր բարձրության վրա այն պոկվել, ընկել էր: Նրանցից մեկը հասցրել էր դուրս թռչել վերելակից, մյուսը՝ ոչ: Երկու տուժածներն էլ գտնվում են հիվանդանոցում: