Ազգային ժողովի ԲՀԿ խմբակցության պատգամավոր Ստեփան Մարգարյանը Սահմանադրական փոփոխություններին դեմ լինելն արտահայտել է՝ հոկտեմբերի 5-ին կայացած քվեարկությանը չմասնակցելով:
NEWS.am-ի թղթակցի հետ զրույցում Ստեփան Մարգարյանը մասնավորապես ասաց. «Իմ դեմ լինելն այսպես արտահայտեցի, եւ կարծում եմ՝ ճիշտ եմ վարվել: Կան տարբեր տեսակետներ, իսկ ինձ համար սա էր ճիշտը»:
Թե ինչու քվեարկությանը չեն մասնակցել Վարդան Օսկանյանը, Վահե Հովհաննիսյանը եւ Էլինար Վարդանյանը, Ստեփան Մարգարյանը խորհուրդ տվեց նրանց հարցնել. «Այնպես չի, որ իրար հետ չենք խոսել, ծիծաղելի կլինի, որ ասեմ՝ չենք տեսնվել: Սակայն հարցրեք յուրաքանչյուրին, թե ինչու չեն մասնակցել»:
Նշենք, որ ԲՀԿ խմբակցությունը նախապես հայտարարել էր, որ կողմ է քվեարկելու նոր Սահմանադրության նախագծին: Հոկտեմբերի 5-ին կայացած քվեարկության ժամանակ դեմ քվեարկեց միայն Տիգրան Ուրիխանյանը, իսկ այսպես կոչված քոչարյանական թեւը ներկա չէր:
Հիշեցնենք, որ Ազգային ժողովը հոկտեմբերի 5-ին ընդունել է «ՀՀ նախագահի համար ընդունելի առաջարկների հիման ՀՀ սահմանադրության փոփոխությունների նախագիծը հանրաքվեի դնելուն համաձայնություն տալու մասին ԱԺ որոշման նախագիծը»: Որոշմանը կողմ է քվեարկել 104, դեմ՝ 10, ձեռնպահ` 3 պատգամավոր: Նախագծին դեմ են քվեարկել ՀԱԿ խմբակցությունը՝ բացառությամբ Լյուդմիլա Սարգսյանի, «Ժառանգությունից» Զարուհի Փոստանջյանը, ՕԵԿ-ից՝ Հեղինե Բիշարյանն ու Իշխան Խաչատրյանը եւ ԲՀԿ խմբակցությունից՝ Տիգրան Ուրիխանյանը:
