«Հայաստանի Էլեկտրական ցանցեր» ընկերության նոր սեփականատիրոջն անհրաժեշտ է էլեկտրաէներգիայի տարբեր էժան աղբյուրներ առաջարկել։  Այդ մասին հոկտեմբերի 6-ին մամուլի ասուլիսի ընթացքում լրագրողներին ասել է Հայրենական ապրանքարտադրողների միության նախագահ Վազգեն Սաֆարյանը՝ հավելելով, որ անհրաժեշտ է քայլեր ձեռնարկել էլեկտրաէներգիայի սակագների իջեցման ուղղությամբ։ 

Անդրադառնալով հարցին, թե էլեկտրաէներգիայի սակագների բարձրացումն ինչպես կազդի երկրում գների վրա, նա նշել է, որ անհրաժեշտ է այդ ոլորտում համագործակցություն ձեւավորել պետության եւ մասնավոր սեկտորի միջեւ։  «Ռազմավարական կարեւորություն ունեցող ոլորտներում պետությունը պիտի վերահսկողական գործառույթ իրականացնի։  Մինչեւ բարձրացումը, էլեկտրաէներգիայի սակագինը բավականին բարենպաստ էր։ Բայց այժմ, բնականաբար, ապրանքների ինքնարժեքը կավելանա  1 – 2%-ով։ Եվ ոմանք կփորձեն մրցունակություն ապահովել այլ ծախսերի, այդ թվում՝ աշխատավարձերի կրճատման հաշվին», - նշել է Սաֆարյանը։

Նրա խոսքով, անհրաժեշտ է բարձրացնել այն էլեկտրաէներգիայի մասնաբաժինը, որն ստացվում է հիդրոէլեկտրակայաններից եւ ԱԷԿ-ից։  «Օրինակ՝ Սեւան-Հրազդան կասկադ ՀԷԿ-ը, որն իր մեջ  7 հիդրոէլեկտրակայան է ներառում, բաշխիչ ցանցերին ընդամենը  500 միլիոն կվտ/ժամ էլեկտրաէներգիա է մատակարարում։  Հավասարակշռության ապահովման հարցում պետությունը պիտի կարողանա որոշակի ճկունություն դրսեւորել», - ավելացրել է Վազգեն Սաֆարյանը։

Հիշեցնենք, որ չնայած բազմաթիվ բողոքներին, Հանրային ծառայությունների կարգավորման հանձնաժողովը հունիսի  17-ին հաստատել էր էլեկտրաէներգիայի սակագնի  6,93 դրամով բարձրացումը՝ այն հասցնելով  48,78 դրամի (մոտ 10,3 ցենտի)։ Հայաստանի վարչապետ Հովիկ Աբրահամյանը հայտարարել է, որ բնակչության եւ փոքր ու միջին բիզնեսի համար Հայաստանի կառավարությունը սուբսիդավորում է էլեկտրաէներգիայի սակագինը։