Սյունիքի մարզի Բարձրավան գյուղի մոտակա ձորում ընկուզենուց ընկած եւ մահացած 64-ամյա Ա. Հ.-ի դին դուրս են բերել ձորից: Այս մասին NEWS.am-ի հետ զրույցում ասաց Բարձրավանի գյուղապետ Օնիկ Ավագյանը:
«Դիակը մեծ դժվարությամբ փրկարարները դուրս բերեցին ձորից: Պարաններով իջան դիակի մոտ, պատգարակների վրա կապեցին, մետր-մետր քաշելով հանեցին»,-ասաց գյուղապետը՝ ավելացնելով, որ դին կտեղափոխեն Գորիսի դիահերձարան, ապա Կապան, որտեղ ապրում է ընտանիքը:
Օնիկ Ավագյանի խոսքով՝ մահացած 64-ամյա Ա.Հ.-ն մտերիմ ընկերոջ հետ է գնացել ընկույզ հավաքելու:
«Ընկույզ հավաքելիս ոտքը սղացել է, գլորվել է ձորը, երկար ժամանակ չէինք կարողանում դին դուրս բերել ձորից, քանի որ տեղանքը եւ եղանակայնի պայմաններն աննպաստ էին»,-ասաց նա:
Գյուղապետը նշեց, որ Ա.Հ.-ն երկու ամուսնացած աղջիկ ուներ, եւ մեկ որդի, որը տասը տարի առաջ նույնպես դժբախտ պատահարի զոհ է դարձել՝ խեղդվել է գետում:
Ավելի վաղ տեղեկացրել էինք, որ Հայաստանի ՏԿԱԻՆ-ում հոկտեմբերի 5-ին, ժամը 18.21-ին տեղեկություն է ստացվել, որ 64-ամյա Ա. Հ.-ն Սյունիքի մարզի Բարձրավան գյուղի մոտակա ձորում ընկուզենուց ընկել է եւ տեղում մահացել:
Կապ է հաստատվել Բարձրավանի գյուղապետի հետ, ով տեղեկացրել է, որ ձորից դիակի դուրս բերման աշխատանքներն իրականացնելու համար վերոնշյալ տարածքը դժվարանցանելի է եւ եղանակը անբարենպաստ, հետեւաբար ոստիկանության օպերատիվ խումբը դեպքի վայր է մեկնելու հոկտեմբերի 6-ի վաղ առավոտյան: Գորիսի ՈԲ երկու աշխատակից դեպքի վայրի մոտակայքում ողջ գիշերն իրականացնելու են դիակի պահպանություն:
Որոշում է ընդունվել Ա. Հ.-ի դին դուրս բերելու համար վաղ առավոտյան դեպքի վայր ուղարկել մեկ մարտական հաշվարկ:
Հոկտեմբերի 6-ին, ժամը 05.40-ին դեպքի վայր է մեկնել Գորիսի ՀՓՋ-ի օպերատիվ խումբը:
