Ուկրաինայի Գերագույն ռադան փոփոխություններ է մտցրել Զինված ուժերում զինծառայություն անցնելու մասին որոշ օրենսդրական ակտերում՝ թույլ տալով, որ այնտեղ ծառայեն նաեւ օտարերկրացիներն ու քաղաքացիություն չունեցողները ու միաժամանակ ուժեղացնելով պատասխանատվությունը վարձկանության համար, հայտնում է «ՈՒՆԻԱՆ»-ը:
Տվյալ օրենքով «Զինապարտության ու զինվորական ծառայության մասին» օրենքում արվել են փոփոխություններ, որոնց համաձայն զինծառայողների կատեգորիային են հավասարվում այն օտարերկրացիները ու քաղաքացիություն չունեցող անձինք, որոնք օրենքին համապատասխան զինծառայություն են անցնում Ուկրաինայի Զինված ուժերում:
Զինված ուժերի մասին օրենքի 5-րդ հոդվածում նույնպես արվել են փոփոխություններ, որոնց համաձայն, Ուկրաինայի ԶՈւ աշխատակիցների առանձին պաշտոններ կարող են զբաղեցնել նաեւ այն քաղաքացիները, որոնք այլընտանքային՝ ոչ ռազմական ծառայություն են անցնում օրենքով նախատեսված կարգով:
Ըստ օրենքի՝ օտարերկրացիները ու քաղաքացիություն չունեցող անձինք, որոնք առաջին անգամ են ծառայության ընդունվում Ուկրաինայի ԶՈւ, պաշտոնապես պարտավորվում են անշեղորեն հետեւել Ուկրաինայի Սահմանադրությանն ու օրենքներին, բարեխիղճ կատարել զինծառայության պարտավորությունները:
Բացի դրանից, ընդունված օրենքով ուժեղացվել է պատասխանատվությունը՝ զինված հակամարտություններում օգտագործելու նպատակով վարձկաններին ֆինանսավորելու համար: Ուկրաինայի Քրեական օրենքի 447 հոդվածում արված փոփոխություններով նախատեսվում է, որ զինված հակամարտություններում, սահմանադրական կարգի տապալմանը կամ բռնի փոփոխմանը, պետական իշխանության զավթմանը, պետական իշխանության մարմինների գործունեության խոչընդոտմանը, կամ երկրի տարածքային ամբողջականության խախտմանն ուղղված ռազմական կամ բռնի գործողություններում օգտագործելու նպատակով վարձկանների հավաքագրումը, ֆինանսավորումը, նյութական ապահովումը եւ մարզումը պատժվում է 5-ից 10 տարվա ազատազրկումով:
Եթե այդ նույն արարքները պաշտոնատար անձն է կատարում՝ օգտագործելով իր ծառայողական դիրքը, նա պատժվում է 7-12 տարվա ազատազրկմամբ եւ ունեցվաքի առգրավումով կամ առանց դրա: Նման գործողությունները, որոնց հետեւանքով մարդ է զոհվում, պատժվում են 10-15 տարվա ազատազրկումով՝ ունեցվածքի առգրավումով կամ առանց դրա:
Բացի դրանից նախատեսված է, որ զինված հակամարտություններին, ռազմական կամ բռնի գործողություններին վարձկանի մասնակցությունը պատժվում է 5-10 տարվա ազատազրկումով: