«Իսլամական պետություն» խմբավորման ահաբեկիչներն ականապատել են Սիրիայի Հոմսի նահանգում գտնվող հնագույն Պալմիրա քաղաքի հռոմեական ամֆիթատրոնը,: Այս մասին «ՌԻԱ Նովոստիին» հայտնել է Սիրիայի մշակույթի նախարարի տեղակալ Ալի ալ-Կայիմը։
«Այդ տեղեկությունը հավաստի է։ Մեզ այդ մասին հայտնել են Պալմիրայի մի քանի բնակիչ, որոնց մենք վստահում ենք։ ԻՊ-ն ականապատել է ամֆիթատրոնը։ Նրանք գիտեն, որ սիրիական ուժերը չեն կարող հարված հասցնել պատմական հուշարձաններին։ Եթե հարձակման փորձ կամ սպառնալիք լինի, նրանք կշարունակել ականապատել մնացած հուշարձանները։ Նման գործողություններն անմարդկային են եւ հակաքաղաքակրթական», — գործակալությանը հայտնել է փոխնախարարը։
Պալմիրան, որի հնագույն ավերակները Սիրիայի տարածքում գտնվող հուշարձանային վեց համալիրներից մեկն են, որոնք ՅՈՒՆԵՍԿՈ-ն համաշխարհային ժառանգության մաս է համարում, գրոհայինների վերահսկողության տակ է հայտնվել մայիսի կեսերին։ Քաղաքը լքելուց առաջ, սիրիական բանակը տարհանել է նրա բնակիչների մեծ մասին, ինչպես նաեւ Պալմիրայի կենտրոնական թանգարանի ամենաթանկարժեք պատմական իրերը։ Քաղաքի գրավումից հետո ոչնչացման սպառնալիքի տակ են հայտնվել հին ավերակներն ու տաճարները։
Կիրակի օրը ԻՊ-ի գրոհայինները պայթեցրեցին Պալմիրայի հնագույն Հաղթական կամարը։ Դրա կառուցումը թվագրվում էր մեր թվարկության երկրորդ դարի կեսով, որը համընկնում է Սեպտիմիո Սեվերո կայսեր կառավարման շրջանին։ Կամարը, ինչպես եւ ամբողջ քաղաքը կառուցված է հռոմեական ոճով։
Օգոստոսին ԻՊ-ի գրոհայինները պայթեցրել էին Պալմիրայի հնագույն Բաալ-Շամինի տաճարը, որը կառուցվել է մեր թվարկության առաջին դարում եւ նվիրված է Բաալ վերին աստվածությանը, որը համեմատելի է հունական Զեւսի հետ։ Այն հնագույն Թադմոր (Պալմիրա) քաղաքի ավերակների համալիրի մաս է կազմում։
Սեպտեմբերի սկզբին ահաբեկիչները քաղաքում երեք դամբանական աշտարակ պայթեցրին, այդ թվում ՝ ամենահայտնի աշտարակներից մեկը՝ Էլահբելի (103 մ.թ.) աշտարակը, որի տակ ստորգետնյա դամբարան կա։