Ղարաբաղի հարցով ԵԽԽՎ զեկուցողները չպետք է կանխակալ լինեն։ Այս մասին հոկտեմբերի 6-ին լրագրողներին հայտնել է ՀՀ խորհրդարանի փոխխոսնակ, ԵԽԽՎ-ում Հայաստանի պատվիրակության ղեկավար Հերմինե Նաղդալյանը՝ մեկնաբանելով միջազգային կառույցի աշնանային նստաշրջանի աշխատանքի արդյունքները։
Նա նշել է, որ բոսնիացի պատգամավոր Միլիցա Մարկովիչը, որը զեկույց է պատրաստում Ղարաբաղում Սարսանգի ջրամբարի մասին, անում է ամեն բան, որպեսզի ժամանակ ձգի եւ անմիջական շփում չհաստատի Լեռնային Ղարաբաղի իշխանությունների հետ, ինչպես առաջարկում են Հայաստանի իշխանությունները։ «Զեկուցողը մի ամբողջ տարի վատնեց, որպեսզի բոլոր հնարավոր միջոցներով խուսափի ԼՂՀ իշխանությունների հետ շփումներից, թեպետ նա զեկույց է պատրաստում Ղարաբաղի մասին»,- ասել է Նաղդալյանը՝ հիշեցնելով, որ զեկույցի անվանումն իրենով չի հուշում անկողմնակալության մասին՝ «Զեկույց Ադրբեջանի սահմանամերձ շրջանների բնակիչներին միտումնավոր ջրազրկելու մասին»։
