Վարչապետ Հովիկ Աբրահամյանն այսօր՝ հոկտեմբերի 6-ին, ընդունել է Հայաստանում Բելառուսի նորանշանակ դեսպան Իգոր Նազարուկին եւ հույս հայտնել, որ նա իր աշխատանքով կնպաստի քաղաքական, տնտեսական, հումանիտար եւ այլ ոլորտներում համագործակցության ամրապնդմանը:
Կառավարության մամուլի ծառայությունից NEWS.am-ին հայտնում են, որ վարչապետը շնորհավորել է Իգոր Նազարուկին՝ դեսպանի պաշտոնն ստանձնելու առթիվ եւ հաջողություն մաղթել դիվանագիտական առաքելության մեջ: Վարչապետը բարձր է գնահատել հայ-բելառուսական միջպետական հարաբերությունները եւ համոզմունք հայտնել, որ դեսպան Նազարուկն իր աշխատանքով կնպաստի քաղաքական, տնտեսական, հումանիտար եւ այլ ոլորտներում համագործակցության էլ ավելի ամրապնդմանը եւ խորացմանը:
Իգոր Նազարուկը շնորհակալություն է հայտնել վարչապետին ընդունելության համար եւ հավաստիացրել, որ պաշտոնավարման ընթացքում կգործադրի ամեն ջանք՝ տարբեր ոլորտներում փոխգործակցությունը խորացնելու եւ երկկողմ կապերն առավել սերտացնելու ուղղությամբ:
Հանդիպման ընթացքում զրուցակիցները մտքեր են փոխանակել հայ-բելառուսական տնտեսական հարաբերությունների ակտիվացման, առկա ներուժի լիարժեք օգտագործման, Եվրասիական տնտեսական միության շրջանակում համագործակցության ընդլայնման հարցերի շուրջ: Այս համատեքստում երկուստեք կարեւորվել է Տնտեսական համագործակցության հարցերով հայ-բելառուսական միջկառավարական համատեղ հանձնաժողովի աշխատանքը:
