Կոտայքի մարզի Աբովյան քաղաքի ծննդատանը սեպտեմբերի 25-ին մահացած ծնված երեխայի դեպքով քրեական գործ է հարուցվել: Այս մասին NEWS.am-ին հայտնեցին ՀՀ քննչական կոմիտեի մամուլի ծառայությունից:
Քրեական գործը հարուցվել է ՀՀ Քրեական օրենսգրքի 130-րդ հոդվածի համաձայն, այն է՝ բժշկական օգնություն եւ սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը:
Հիշեցնենք, որ սեպտեմբերի 27-ին ոստիկանության Կոտայքի բաժնում հաղորդում է ստացվել քաղաքացի Ռ.Գրիգորյանից առ այն, որ անհրաժեշտ բժշկական միջամտությունն ուշացնելու հետեւանքով իրենց առողջ զավակը ծնվել է մահացած։ Ըստ դիմումատուի՝ կինը, լինելով հղի, հաշվառված է եղել Աբովյանի ծննդատանը, որտեղ կատարվել են հղիության ընթացքի ստուգումներ: Օգոստոսին կատարված սոնոգրաֆիայի արդյունքում պարզվել է, որ պտուղը մոր արգանդում պտտվել է եւ գտնվում է հետույքային առաջադիմության դիրքում, սակայն պտղի զարգացումը եղել է նորմալ, եւ բժիշկը որոշել է ծնունդն ընդունել կեսարյան հատումով:
Սեպտեմբերի 15-ին կնոջ մոտ ցավեր են սկսվել: Բժիշկը, տեղեկանալով այդ մասին, որոշել է նույն օրը՝ ժամը 22-ին, կատարել կեսարյան հատում, սակայն սկսվել են ծննդաբերության բնական ցավեր: Արդյունքում կեսարյան հատում չի կատարվել, որի հետեւանքով պտուղը ծնվել է մահացած: Հարազատները դիմել են իրավապահ մարմիններին: Նշանակվել է դատաբժշկական փորձաքննություն: