Արարատի մարզի մի քանի գյուղերի խաղողագործներ, որոնք բերքը մեքենաներում բեռնած արդեն 3-ից 5 օր է` կանգնած են Մասիսում գտնվող, Գագիկ Ծառուկյանին պատկանող «Նոյ» գինու, կոնյակի կոմբինատի դիմաց, այսօր` հոկտեմբերի 6–ին, փակել են Երեւան-Արտաշատ մայրուղու մի կողմը:
NEWS.am-ի թղթակիցը հողորդում է, որ գյուղացիները փողոցը փակել են բեռնատարներով: Ոստիկանները փորձել են հեռացնել մեքենաները, սակայն խաղողագործները թույլ չեն տվել:
«3-ից 5 օր է` կանգնել ենք, չեն ընդունում խաղողը, գյուղնախարարություն ենք զանգել, փորձել ենք կապնվել տնօրինության հետ, ոչ մի արդյունք: Գործարանի դռները փակել են, տնօրինությունից ասում են` որոշողը Գագիկ Ծառուկյանն է, մենք չենք կարող միջամտել: Կառավարության թեժ գիծ ենք զանգել, պատասխանում են, որ կառավարությունը նման հարցերով չի զբաղվում: Ոչ ոք գյուղացիներին չի օգնում»,- NEWS.am-ին ասաց Արեւաշատի բնակիչ, խաղողագործ Բաբկեն Հարությունյանը` նշելով, որ գործարանի տնօրինությունը բերքը չընդունելը պատճառաբանել է նրանով, որ բերքի որակը չի համապատասխանում պահանջվող չափանիշներին:
Գյուղացիները պնդում են, որ իրենց բերքի որակը համապատասխանում է բերքի ընդունման պահանջներին, եւ գործարանի տնօրինությունը անհիմն պատճառաբանություն է բերում:
Գյուղացիներին այս պահին մոտեցել է Արարատի մարզպետը:
Նշենք, որ վերջին շրջանում Արարատի մարզում գյուղացիները խաղողով լցված բեռնատարներով պարբերաբար փակում են մայրուղին՝ պահանջելով մթերել իրենց խաղողի բերքը: Մեկ անգամ նրանց հետ է հանդիպել վարչապետը, խոստացել լուծում տալ խնդրին: Գագիկ Ծառուկյանը Արմավիրի մարզի խաղողագործների հետ հանդիպմանը նույնպես խոստացել էր մթերել պայմանագրեր ունեցող բոլոր խաղողագործների բերքը։ Գյուղացիները հանդիպման օրը կարողացել են մթերել բերքը, սակայն հաշված օրեր անց նորից նույն խնդրի առջեւ են կանգնել:
