Թուրքիայի «Ազգայնական շարժում» (MHP) կուսակցության Բոռի շրջանային կառույցը նախագահ Ռեջեփ Թայիփ Էրդողանի՝ տարիներ առաջ արտահայտած 2 մտքերը պաստառի վրա փակցրել է կուսակցության գրասենյակի պատին։
Թուրքական Cumhuriyet-ի փոխանցմամբ՝ MHP-ի Բոռի շրջանի գրասենյակի պատի վրա փակցվել է պաստառ, որում ներկայացվել են Թուրքիայի ներկայիս նախագահ Ռեջեփ Թայիփ Էրդողանի կողմից 1994-ին եւ 1999-ին արտահայտած 2 մտքեր։
«1994. Ահա, իմ ամբողջ հարստությունն այս մատանին է. 1999. Եթե մի օր լսեք, որ Թայիփ Էրդողանը շատ է հարստացել, իմացեք՝ ուրեմն «հարամ» փողեր է կերել»,-գրվել է պաստառի վրա։
Էրդողանի խոսքերը մեջբերելուց հետո «Ազգայնական շարժում» կուսակցությունը ավելացրել է. «Մեկնաբանությունը թողնում ենք ժողովրդին»։
Նշենք, որ 2013-ի դեկտեմբերի 17-ի «Մեծ կաշառք» գործողության ժամանակ հայտնվել էին ձայնագրություններ, որտեղ Էրդողանը հրահանգում է որդուն տնից այլ տեղ տեղափոխել միլիարդավոր դոլարները։
Բացի այդ, թուրքական մամուլում արդեն հայտնի է դարձել, որ Էրդողանի որդին՝ Բիլալ Էրդողանը, միլիարդավոր դոլարներով ու զինված թիկնապահների ուղեկցությամբ փախել է Իտալիա, որտեղից պետք է կառավարի Էրդողանին պատկանող միլիարդավոր դոլարները Շվեյցարիայում եւ հարեւան երկրներում։