Միջազգային հանրության ուշադրությունը պիտի հրավիրվի այն ամենի վրա, ինչը խախտում է հրադադարը։ Այդ մասին NEWS.am-ի թղթակցի հետ զրույցում ասել է խաղաղարար գործողությունների հարցերով ՄԱԿ-ի գլխավոր քարտուղարի օգնական Էդմոն Մուլեն՝ պատասխանելով ադրբեջանական զինված ուժերի կողմից ղարաբաղյան հակամարտության գոտում հրադադարի ռեժիմի պարբերական խախտումների մասին հարցին։
Նա հիշեցրել է, որ ՄԱԿ-ի գլխավոր քարտուղարը բազմիցս հակամարտության խաղաղ կարգավորման, երկխոսության, կանխարգելող դիվանագիտության կոչ է արել։ «Հուսով եմ, որ բոլոր խաղացողները ականջ կդնեն նրա կոչին հակամարտության քաղաքական, ոչ թե ռազմական լուծման հասնելու համար», - նշել է Մուլեն։ ԵԱՀԿ Մինսկի խումբը, շարունակել է նա, այս իրավիճակի առաջատարն է։ ՄԱԿ-ն աջակցում է այս ձեւաչափին, բայց բանակցություններում գլխավոր դեր չի խաղում։ «Կարծում եմ, որ Հայաստանը պիտի շարունակի ԵԱՀԿ-ի եւ, ինչո՞ւ չէ, ՄԱԿ-ի աջակցությամբ բարձրացնել այս հարցը։ Մենք բոլորս խաղաղության ջատագով ենք, եւ միջազգային հանրության ուշադրությունը պիտի հրավիրվի այն ամենի վրա, ինչը խախտում է հրադադարը։ Դա այն է, ինչ արել է ձեր ղեկավարությունը, այդ թվում նաեւ՝ Գլխավոր համաժողովի նստաշրջանի ընթացքում՝ միջազգային հանրության ուշադրությունը հրավիրելով այդ հակամարտության վրա», - նշել է Էդմոն Մուլեն՝ ընդգծելով, որ կոչերը պիտի նորից եւ նորից բարձրաձայնվեն։
Ինչպես հաղորդել էր NEWS.am-ը , սեպտեմբերի 25-ին 17:30-ին ադրբեջանական զինված ուժերը թուրքական արտադրության TR-107 հրթիռա-հրետանային համակարգերից գնդակոծության են ենթարկել Ղարաբաղի Պաշտպանության բանակի հյուսիս-արեւելյան հատվածում տեղակայված զորամասերից մեկի պաշտպանական դիրքերը ։ Հրաձգության հետեւանքով 4 մարդ է զոհվել, 16 զինվորական բեկորային վնասվածքներ է ստացել։ Ադրբեջանական բանակի՝ Նախիջեւանում տեղակայված ստորաբաժանումներից մեկը հոկտեմբերի 1-ին՝ 22:30-ին փորձել է խախտել Հայաստանի պետական սահմանը հարավ-արեւմուտքում՝ հայկական Երասխ գյուղի ուղղությամբ։ Սակայն հակառակորդի փորձը նկատվել է միջդիրքային տարածքում եւ կասեցվել Հայաստանի ԶՈՒ-ի ստորաբաժանումների կողմից, ինչի հետեւանքով հակառակորդը նահանջել է։
