Սահմանադրական փոփոխությունների հանրաքվեն ոչ այլ ինչ է, քան Հայաստանի հայաթափման ծրագիր։ Այդ մասին խորհրդարանի ամբիոնից հայտարարել է ԱԺ պատգամավոր Զարուհի Փոստանջյանը։

«Հանրապետության ղեկավարման և կառավարման ինստիտուտները 1995 թվականից առ այսօր պարբերաբար զավթվեցին ապազգային, հանցավոր անձերի կողմից: Այդ ժամանակ առաջին անգամ հրապարակավ շրջանառվեց հետամնաց, ավտորիտար ռեժիմներին բնորոշ թեզը` «եթե անգամ իրենք հավաքած լինեին 100 տոկոսանոց ձայն` միանշանակ է, որ ո´չ բանակը, ո´չ ներքին գործերը նման քաղաքական ղեկավարներ չեն ընդունելու և չեն ընդունել»: Այս թեզը ապագայում դարձավ բոլոր համապետական ընտրությունների գաղափարախոսությունը` վերածվելով «ինչքան ուզես, էնքան խփենք» կարգախոսի»,- ասել է Փոստանջյանը:

Նրա խոսքով, իշխանագողության գործողությունների հետևանքով ոչ միայն ունեցանք ունեզրկում, ապօրինի ազատազրկումներ, սպանություններ, այլ նաև զանգվածային արտագաղթ, որի հետևանքով Անկախ Հայաստանի և Արցախի Հանրապետությունները հայաթափվել են: «Այսօր մեզ պարտադրվում է հայրենիքից հայթափման ծրագրի հաջորդ փուլը, որի աշխատանքային անվանումն է «Սահմանադրական փոփոխությունների հանրաքվե»` իշխանագողություն: Զանգվածային հայաթափման փուլը կանխելու համար մեզ անհրաժեշտ է միասնություն, համախմբվածություն և ինքնուրույն առաջնորդություն»,- նշել է նա։