ԱՄՆ ռազմածովային ուժերի USS Porter DDG 78 հածանավը, որն «Իջիս» հակահրթիռային պաշտպանության համակարգ եւ «Տոմահավկ» թեւավոր հրթիռ ունի, երեքշաբթի Սեւ ծովի ջրային տարածք է մտել: Այս մասին հաղորդել են թուրքական լրատվամիջոցները՝ Բոսֆորով նավի անցման լուսանկարներ հրապարակելով:
ԱՄՆ ՌԾՈՒ 6-րդ օպերատիվ նավատորմի հրամանատարությունը նախօրեին հաղորդել էր, որ հածանավը «Սեւ ծով է ուղղվել՝ տարածաշրջանում խաղաղությանն ու կայունությանը նպաստելու համար»:
«Նովոստի Mail.Ru»-ի փոխանցմամբ, արշավն իրականացվում է «Ատլանտյան վճռականություն» գործողության շրջանակում, որի նպատակն է ուկրաինական ճգնաժամի ֆոնին ՆԱՏՕ-ում ԱՄՆ դաշնակիցների աջակցությունը ցուցադրել Բալթիկ եւ Սեւ ծովերում:
Ուկրաինայի արեւելյան շրջաններում ճգնաժամից ի վեր Սեւ ծովում մշտապես ամերիկյան եւ ՆԱՏՕ-ի ոչ սեւծովյան այլ երկրների ՌԾՈՒ նավեր կան: «ԱՄՆ-ն հավատարիմ է Արեւելյան Եվրոպայում մշտական ներկայության ապահովմանը»,- ասված է ամերիկյան կողմի հայտարարությունում: